Гарадскія фінальныя спаборніцтвы па спартыўнай гімнастыцы «Юны гімнаст», прысвечаныя 750-годдзю Магілёва, пройдуць 30 верасня ў Палацы гімнастыкі. Пра гэта карэспандэнту сайта паведамілі ў ГСУСУ «Магілёўская гарадская СДЮШАР «Багіма» імя А. Р. Мішчанкі.

У спаборніцтвах прымуць удзел больш за 200 перспектыўных для заняткаў спартыўнай гімнастыкай дзяцей 2011-2012 гадоў нараджэння. Дзяўчынкі і хлопчыкі з’яўляюцца пераможцамі папярэдніх адбораў, якія адбыліся 14-21 верасня ва ўсіх установах дашкольнай адукацыі Ленінскага раёна Магілёва.

У кожнай узроставай групе ўдзельнікі спаборніцтваў змогуць памерацца сіламі ў шасці відах праграмы, паспрабуюць стаць самымі моцнымі ў мнагабор’і. Дадаткова пераможцамі будуць прызнаны гімнасты, якія занялі чацвёртае месца ў мнагабор’і і праявілі, на думку галоўнай судзейскай калегіі, найбольшыя волю і спартыўны характар. Яны будуць узнагароджаны ў намінацыях «За волю да перамогі» і «Алімпійскі рэзерв».

«Перамога ў турніры для многіх дзяцей стане пропускам у малодшы юніёрскі склад па спартыўнай гімнастыцы Магілёва, а ў далейшым дазволіць удзельнічаць у прэстыжных абласных і рэспубліканскіх спаборніцтвах», – адзначылі суразмоўцы. Яны дадалі, што без прызоў не застанецца ніхто: кожнаму ўручаць дыплом.

Завершыцца мерапрыемства паказальнымі выступленнямі наймацнейшых навучэнцаў Магілёўскай гарадской СДЮШАР «Багіма» імя А. Р. Мішчанкі.

Арганізатарамі спаборніцтваў выступаюць аддзел адукацыі, спорту і турызму Магілёўскага гарвыканкама, СДЮШАР «Багіма». Генеральны партнёр – БРУСП «Белдзяржстрах». Афіцыйныя партнёры спаборніцтваў: РУП “Белтэлекам”, Магілёўскія абласная, гарадская, Ленінская горада Магілёва раённая арганізацыі РГА “Белая Русь”, Прадстаўніцтва НАК у Магілёўскай вобласці.

Расклад спаборніцтваў:

11.00 – адкрыццё

11.00 – 13.00 – спаборніцтвы ў мнагабор’і і асобных відах

13.10 – цырымонія ўзнагароджання.

Уваход свабодны.