Абсалютнай пераможцай першага вялікага Магілёўскага Мебелайн марафону стала сямейная пара з Магілёва. Першым дыстанцыю ў 42 км і 195 метраў сярод мужчын пераадолеў Юрый Капцяроў, былы спартсмен, а цяпер працаўнік Шклоўскага аддзялення МНС, а сярод жанчын яго жонка – Вольга Камінская, якая працуе ў дзіцяча-юнацкай спартыўнай школе «Марафон». Юрый прабег дыстанцыю за 2 гадзіны 26 хвілін і 51 секунду, Вольга – за 2 гадзіны 53 хвіліны і 43 секунды.

Як адзначылі члены судзейскай калегіі, з улікам наяўнасці на дыстанцыі чатырох пад’ёмаў, дасягнуты вынік больш чым дастойны. Лідары гонкі ўзнагароджаны дыпломамі, кубкамі, памятнымі прызамі ад спонсараў мерапрыемства і грашовымі прызамі па Br2 тыс. кожны.

Ужо пасля фінішу пераможцы, дзелячыся ўражаннямі пераадолення марафонскага забегу, адзначалі, што прабеглі дыстанцыю з запасам сіл, напэўна, таму, што дома і сцены дапамагаюць. Для іх перамога стала двайным святам, і зноў жа таму, што даўняя мара прыняць удзел у марафоне ў родным горадзе ажыццявілася.

У спісе прызёраў на марафонскую дыстанцыю – Мікіта Чахоўскі з Магілёва, Генадзь Жаўранак з Беразіно, Аляксандр Кошур з Баранавіч, Дзмітрый Рэвін з Магілёва, Андрэй Вагін з Мінска, Ніна Савіна з Бабруйска, Інэса Салькевіч з Наваполацка, Надзея Саракапыт з Мінска, Крысціна Рулькевіч з Мінска і Таццяна Шапура з Магілёва. У забегу на 42 км і 195 метраў за перамогу змагаліся 67 чалавек.

Усяго ў Магілёўскім Мебелайн марафоне прынялі ўдзел больш за 3 тысячы бегуноў. Самай юнай – Дашы Сівовай – было ўсяго 10 гадоў. Самы ўзроставы спартсмен марафону Віктар Кучынскі на дзень забегу меў поўныя 81 год. У марафоне прынялі ўдзел два інваліды-калясачнікі – Дзмітрый Архіпенка і Алег Юркоў.

У дыстанцыі на 10 км лепшы вынік прадэманстравалі Мікіта Кацянёў (31 хвіліна 16 секунд) з Мінска і Таццяна Сцефаненка (35 хвілін 42 секунды) з Магілёва. У забегу на 4 кіламетры пераможцамі сталі Аляксандр Санько з Мінска (12 хвілін 36 секунд) і Аліна Сіневіч з Мінскай вобласці (16 хвілін 3 секунды).

Вітаў удзельнікаў марафону Міхаіл Шаўцоў, які прымаў удзел 32 гады таму ў першым чэмпіянаце СССР па марафоне, які праходзіў у Магілёве. Праз два гады спаборніцтвы паўтарылі.

Вярнуць традыцыю праводзіць у Магілёве марафон, пра які будуць ведаць далёка за межамі не толькі горада, а і краіны, – такая галоўная мэта аднаго з галоўных арганізатараў спаборніцтваў і іх спонсара – літоўскага канцэрна SBA, прэзідэнт якога Арунас Марцінкявічус выйшаў з прапановай да абласных і гарадскіх улад правесці ў Магілёве вялікі марафон. У дзень яго правядзення – 1 кастрычніка ён не толькі прыбыў у горад, але і прыняў сам удзел у забегу на 10 км.

У рамках марафону на плошчы Славы, дзе аматары бегу стартавалі і фінішавалі, праходзіла ўсе 6 гадзін спаборніцтваў канцэртна-забаўляльная праграма, а таксама адбыліся дзіцячыя лёгкаатлетычныя спаборніцтвы, па выніках якіх памятнымі прызамі ад спонсараў узнагародзілі 36 хлопчыкаў і дзяўчынак.

Раздаючы інтэрв’ю журналістам, марафонцы, асабліва якія маюць велізарны вопыт забегаў у суседніх з Беларуссю краінах, акцэнтавалі ўвагу на высокім арганізацыйным узроўні магілёўскага свята бегу.

mogilevnews.by