Прэм'ерай спектакля «Кропкі на часавай восі» адкрые новы сезон 10 кастрычніка Магілёўскі абласны тэатр драмы і камедыі імя Дуніна-Марцінкевіча (Бабруйск), паведамілі ў адміністрацыі ўстановы культуры.

Новую пастаноўку па п'есе аднаго з самых вядомых і паспяховых маладых беларускіх драматургаў Дзмітрыя Багаслаўскага ставіць запрошаная група з Мінска на чале з кіраўніком Цэнтра эксперыментальнай рэжысуры Беларускай дзяржаўнай акадэміі мастацтваў Таццянай Траяновіч. У рабоце над спектаклем занята большая частка бабруйскай трупы.

Упершыню п'еса прэзентавалася на фестывалі сучаснай драматургіі WriteBox у 2016 годзе. У аснове аўтарскага тэксту - дакументальныя фатаграфіі, знятыя ў розныя адрэзкі часу, пачынаючы з Першай сусветнай вайны, і ў розных частках зямлі - ад Кітая да Венесуэлы. Здымкі становяцца зыходнымі пунктамі для дзесяці людскіх гісторый аб пераломных момантах жыцця, патрабуючых прыняцця важнага рашэння, якое мяняе чалавека і яго ўспрыманне.

Спектакль, як часта адбываецца ў выпадках з сучаснай драматургіяй, ужо ахрысцілі эксперыментальным. Але яго асноўная ідэя і пасыл будуць цалкам традыцыйнымі: вера ў чалавека, асэнсаванасць і прыгажосць яго існавання.

Субяседнікі падкрэслілі, што менавіта з пастаноўкай «Кропкі на часавай восі» тэатр заяўлены да ўдзелу ў Рэспубліканскім фестывалі нацыянальнай драматургіі імя В.І. Дуніна-Марцінкевіча, які пройдзе ў Бабруйску з 17 па 22 лістапада пры падтрымцы Міністэрства культуры.

У дзвюх конкурсных праграмах форуму - «Спектакль тэатра драмы» і «Эксперымент» - папярэдне заяўлены 12 лепшых спектакляў мінулых і бягучага тэатральных сезонаў, пастаўленых па творах беларускіх драматургаў. У іх ліку Цэнтр візуальных і выканальніцкіх мастацтваў «Арт карпарэйшн» (Мінск) з праектам «Опіум», Беларускі дзяржаўны тэатр лялек са спектаклем «Ладдзя роспачы», Слонімскі драматычны тэатр з пастаноўкай «Тарас на Парнасе», незалежная тэатральная група з Санкт-Пецярбурга «тэатр post» з работай «Поле». Магілёўскі абласны драматычны тэатр плануе прывезці на фестываль драму «Скарына», а Магілёўскі абласны тэатр лялек - галюцынацыю «Сіняя-сіняя». У кожнай з катэгорый выберуць лепшы спектакль, рэжысуру, сцэнаграфію, п'есу сучаснага беларускага аўтара, вызначаць лепшую мужчынскую і жаночую ролі, у тым ліку другога плана. Акрамя конкурснай праграмы, у час фэсту пройдуць традыцыйныя чытанні п'ес.