Прыр​одны газ прыйшоў у аграгарадкі Бярозкі, Боханы і вёску Янаполле Хоцімскага раёна. У гонар гэтай падзеі ў Бярозках ўрачыста запалілі сімвалічны факел.

Газаправод высокага ціску да аграгарадкоў Боханы і Бярозкі даўжынёй амаль 16 км пабудаваны ў адпаведнасці з Дзяржаўнай праграмай «Камфортнае жыллё і спрыяльнае асяроддзе» на 2016-2020 гады. З задачай газавікі справіліся ўсяго за 3,5 месяцы (пры нарматыве 5,5 месяцаў). У выніку ўжо восем сельскіх населеных пунктаў Хоцімскага раёна будуць газіфікаваны.

«Пуск газу – гэта сапраўды значны крок у развіцці паўднёва-ўсходняга рэгіёна вобласці, – сказаў генеральны дырэктар РУП «Магілёўаблгаз» Аляксей Кушнарэнка. – Мы ў сваю чаргу зробім усё для таго, каб забяспечыць безаварыйнае і бесперабойнае газазабеспячэнне».

Новы газаправод дазволіў перавесці са звадкаванага на прыродны газ у шматкватэрным жылым фондзе аграгарадка Бярозкі 40 кватэр і адкрыў перспектыву далучэння да сетак 223 індывідуальныя жылыя дамы, у Боханах – 229 і Янаполлі – 48. На сённяшні дзень у Хоцімскім раёне газіфікаваны прыродным газам чатыры з васьмі наяўных аграгарадкоў: Бяседавічы, Забялышын, Бярозкі і Боханы.

У Магілёўскай вобласці з 1981 года газіфікаваны ўсе гарады і райцэнтры, а таксама 296 сельскіх населеных пунктаў, з якіх 132 – аграгарадкі. Сёння ў рэгіёне 330 тыс. кватэр і індывідуальных жылых дамоў выкарыстоўваюць блакітнае паліва.

БЕЛТА