У Магілёўскай вобласці беспрацоўным пад адкрыццё сваёй справы з пачатку года выдалі больш за 220 субсідый, што прыкладна на 16% больш, чым за аналагічны перыяд мінулага года. Пра гэта паведамілі ў камітэце па працы, занятасцi i сацыяльнай ахове аблвыканкама.

Для арганізацыі прадпрымальніцкай дзейнасці падтрымку атрымалі каля 80% беспрацоўных, астатнія – рамеснай дзейнасці. Прычым больш за 200 атрымальнікаў субсідый прайшлі навучанне асновам бізнес-планавання. Да канца бягучага года ў рэгіёне маюць намер выдаць не менш 310 субсідый.

Больш за ўсё актыўных грамадзян звяртаецца па дзяржпадтрымку ў буйных гарадах – Магілёве і Бабруйску. Сярод асноўных відаў прадпрымальніцкай дзейнасці, якія арганізуюць беспрацоўныя, – аказанне розных паслуг (транспартныя, цырульні, правядзенне будаўніча-аддзелачных работ, пашыў і рамонт адзення, тэхнічнае абслугоўванне і рамонт аўтамабіляў), а таксама вытворчасць сельгаспрадукцыі, гандлёвая дзейнасць і інш.

Паводле слоў суразмоўцаў, для вырашэння пытання аб прадастаўленні субсідыі беспрацоўны падае ў органы па працы, занятасці і сацахове па месцы сваёй рэгістрацыі адпаведную заяву, падае тэхніка-эканамічнае, у тым ліку фінансавае абгрунтаванне (бізнес-план) эфектыўнасці арганізацыі будучай дзейнасці. Субсідыя прадастаўляецца ў памеры 11-кратнай велічыні бюджэту пражытачнага мінімуму ў сярэднім на душу насельніцтва (БПМ). Жыхарам малых гарадоў і раёнаў з высокай напружанасцю на рынку працы, сельскіх населеных пунктаў субсідыя прадастаўляецца ў памеры 15 БПМ. Пры арганізацыі прадпрымальніцкай дзейнасці, звязанай з укараненнем вынікаў навуковых даследаванняў і распрацовак, можна разлічваць на субсідыю ў памеры 20 БПМ.

БЕЛТА