Білеты на Міжнародны музычны фестываль «Залаты шлягер» карыстаюцца вялікім попытам. Форум пройдзе ў Магілёве 22-29 кастрычніка, як паведамілі карэспандэнту сайта ў абласной філармоніі.

Паводле слоў суразмоўцаў, усе сем дзён фестывалю будуць насычаны рознымі канцэртнымі праграмамі і мерапрыемствамі, у якіх прымуць удзел зоркі эстрады. «Глядач чакае гэты форум, паколькі ён дае магчымасць убачыць і пачуць любімых выканаўцаў, – адзначылі суразмоўцы. – На некаторыя канцэрты білеты ўжо не дастаць: яны разляцеліся яшчэ ў жніўні-верасні».

Так, цалкам раскуплены білеты на ўрачыстае адкрыццё і закрыццё фестывалю, кошт якіх вар’іраваўся ад Br50 да Br70. Не засталося ў касе філармоніі квіткоў на канцэрт вакальна-інструментальнага ансамбля «Синяя птица» (Расія), музычную праграму Магілёўскай абласной філармоніі «Кінамузыка. Залатая калекцыя» з удзелам камерна-інструментальнага ансамбля «Gold String».

Трэба паспяшацца тым, хто жадае патрапіць на канцэрты народнага артыста Расіі Аляксандра Малініна, джазавай музыкі і Заслужанага калектыву Нацыянальнага акадэмічнага канцэртнага аркестра Беларусі пад кіраўніцтвам Міхаіла Фінберга і саліста Маскоўскага акадэмічнага музычнага тэатра ім. К.С. Станіслаўскага і У. І. Неміровіча-Данчанкі Чынгіса Аюшэева і салісткі Каралеўскага опернага тэатра Італіі і тэатра В.Беліні (Сіцылія) Алены Аюшэевай у суправаджэнні Заслужанага калектыву Беларусі аркестра народных інструментаў імя народнага артыста Беларусі Л.Л. Іванова. «Білетаў практычна не засталося, – удакладнілі суразмоўцы. – Усе самыя дарагія білеты і білеты ў цэнтры залы выкуплены. Праўда, на некаторыя канцэрты яшчэ засталіся нядрэнныя варыянты рассаджвання па цане Br15-22, а на Аляксандра Малініна – Br50-70 ».

Крыху больш запаветных пуцёвак засталося на выступленне аркестра баяністаў імя П.І. Смірнова пад кіраўніцтвам народнага артыста Расіі Ю.П. Смірнова. Кошт білетаў складае Br15-22.

Міжнародны музычны фестываль «Залаты шлягер» упершыню быў арганізаваны ў лістападзе 1995 года пры падтрымцы Прэзідэнта Беларусі Аляксандра Лукашэнкі. Музычны форум прыняты ў Міжнародную федэрацыю фестывальных арганізацый (FIDOF), якая аб’ядноўвае больш за 150 фестываляў мастацтваў. На фестывалях у розны час удзельнічалі прызнаныя майстры сусветнага мастацтва больш чым з 25 краін.

Гэты творчы праект – унікальная з’ява ў культурным жыцці не толькі рэспублікі і вобласці, але і ў міжнародным жыцці ў цэлым. Гэта цудоўнае свята музыкі і песні, яго заўсёды адрознівалі і адрозніваюць высокае паэтычнае слова, глыбокі лірызм і сардэчнасць, паколькі ідэя фестывалю першапачаткова ўзнікла з жадання сабраць разам «забытых» артыстаў, якія складаюць залаты фонд савецкай песні.