«Добры​ молодцы» – не праект, гэта стыль жыцця. На гэта звярнуў увагу журналістаў удзельнік вакальна-інструментальнага ансамбля Андрэй Кірысаў падчас прэс-канферэнцыі з артыстамі, якія прыехалі ў Магілёў на міжнародны музычны фестываль «Залаты шлягер».

«Шоу-бізнес – гэта не мы. Наша творчасць іншае, – адзначыў Андрэй Кірысаў.– У нас свае паняцці: навошта існуём, што робім. І выдатна жывём у гэтым стане».

Легенда савецкай і расійскай эстрады ВІА «Добры молодцы» на сцэне з 1969 года. У першай паловы 70-х шмат гастраляваў. Хоць касцяк калектыву на працягу доўгіх гадоў заставаўся нязменным, на розных этапах да яго далучаліся розныя музыканты, у тым ліку Юрый Антонаў, Аляксей Глызін, Сева Наўгародцаў, Людміла Барыкіна. Група была своеасаблівай пляцоўкай творчасці і стартам для многіх талентаў таго часу. З музыкантамі супрацоўнічаў кампазітар Давід Тухманаў. «Добры молодцы» выканалі і запісалі некаторыя з першых песень Вячаслава Дабрыніна, які тады толькі пачынаў. Водгук у душы слухачоў знайшлі не толькі папулярныя савецкія песні, але і асучасненая народныя ў жывым вакальным і інструментальным выкананні.

Распаўся калектыў у 1990 годзе, каб у 1994-м намаганнямі найстарэйшага яго ўдзельніка Андрэя Кірысава «ўваскрэснуць» зноў, аднавіць стары рэпертуар і паспець пракатаць яго ў гастрольных паездках, пераканаўшыся ў тым, што ансамбль яшчэ не забыты і папулярны.

«Мы людзі дарослыя, у некаторых ужо ёсць унукі. Таму выступаем і паказваем тую музыку, якую самі бязмежна любім, – адзначыў яшчэ адзін удзельнік групы Сяргей Гарбатаў. – Шчыра кажучы, сабраліся зноў менавіта для таго, каб пакінуць песні вакальна-інструментальных ансамбляў 70-х дзецям і ўнукам, бо ў 90-х гэтага жанру не было ні на эстрадзе, ні на тэлевізійных экранах».

На «Залаты шлягер» група прыехала як з мэтрамі, так і з маладымі ўдзельнікамі ВІА, якія, па словах музыкаў, заўсёды прыўносяць у калектыў свежую струю энергіі і ідэй. Аднак цалкам мяняць склад на новы не спяшаюцца. «За намі гісторыя, вопыт і разуменне душэўных перажыванняў і музычных пераваг публікі, якая нас ведае і памятае», – падкрэслілі артысты.

На музычным фестывалі ў Магілёве «Добры молодцы» былі не аднойчы, апошні раз – у 2005 годзе. Тады Сяргей Гарбатаў уваходзіў у журы конкурсу вакальна-інструментальных ансамбляў, прысвечанага памяці народнага артыста СССР і Беларусі Уладзіміра Мулявіна. «Вельмі спадабаліся выступленні, таленавітая моладзь са сваімі арыгінальнымі ідэямі, – адзначыў ён. – Шкада, што ў фармаце сёлетняга фестывалю конкурсу няма».

З настальгіяй музыкант успомніў і пра такі напрамак «Залатога шлягера» 90-х, як кінаэстрада. «Прыязджалі вядомыя артысты кіно і тэатра, дзяліліся жыццёвымі гісторыямі, гэта было цікава, – падкрэсліў Сяргей Гарбатаў. – Бо шлягеры з’яўляюцца не толькі на сцэне. У добрым кіно іх нават больш».

Удзельнікі ВІА прыбылі ў Магілёў ранішнім цягніком. Музыкантаў парадаваў сардэчны прыём і вялікая цікавасць да іх творчасці. Яны выказалі шкадаванне з нагоды таго, што ўсяго дзень будуць знаходзіцца на форуме і падораць магілёўцам толькі дзве песні: «Добры молодцы, красны девицы» і «Люди встречаются, люди влюбляются». Аднак, па словах артыстаў, магчыма ўжо гэтай вясной беларусаў чакаюць сольныя канцэрты ансамбля. Перагаворы з гэтай нагоды ўжо вядуцца.

Акрамя таго, «Добры молодцы» адзначылі, што вельмі любяць Беларусь. «Гэта краіна, дзе выпускаюць не толькі магутныя і надзейныя трактары. Тут жывуць прыгожыя дзяўчаты, – заўважыў Андрэй Кірысаў. – І добра захаваўся нацыянальны складнік».

Дарэчы, менавіта легендарнаму ВІА першаму сярод запрошаных зорак далі права выступіць на сцэне падчас урачыстага адкрыцця «Залатога шлягера». Адразу пасля выканання ўсімі любімых песень госці хутка сабраліся і зноў накіраваліся на чыгуначны вакзал – праца кліча. А хацелася, па словах Андрэя Кірысава, як на папярэднім форуме, у вольны час згуляць на магілёўскім полі хоць бы адзін футбольны матч з калегамі.