Рэспубліканскі фестываль нацыянальнай драматургіі імя В. Дуніна-Марцінкевіча будзе садзейнічаць адкрыццю новых імёнаў, як паведаміла на прэс-канферэнцыі першы намеснік Міністра культуры Беларусі Ірына Дрыга.

Арганізатары фестывалю ў гэтым годзе прынялі рашэнне аб змене яго фармату, з тым каб ён спрыяў адкрыццю новых імёнаў і падтрымцы маладых імёнаў, якія ўжо заявілі пра сябе, менавіта ў Беларусі. «Гэта робіцца з мэтай, каб беларускія драматургі маглі раскрыцца на радзіме, стаць вядомымі ў першую чаргу дома, а не за межамі краіны, і будзе спрыяць развіццю нацыянальнага тэатра», – сказала першы намеснік Міністра.

Упершыню на фестывалі сфарміраваны дзве самастойныя конкурсныя праграмы: «Спектакль тэатра драмы» і «Эксперыментальны тэатр» (прадстаўлены як драматычныя, так і лялечныя спектаклі). «Галоўны крытэрый пры адборы заявак – інавацыйная форма тэатральнага зместу, падача матэрыялу», – адзначыла Ірына Дрыга.

«Праграма гэтага года радуе разнастайнасцю», – сказала яна. У ёй прадстаўлены як пастаноўкі рэгіянальных тэатраў, якія працуюць над беларускай драматургіяй, так і пастаноўкі сталічных тэатраў. Паводле слоў Ірыны Дрыга, у фестывальную конкурсную праграму ўвайшлі працы, якія адрозніваюцца арыгінальнасцю пастаноўкі.

Упершыню на фестывалі будзе ацэньваць працы прафесійнае журы. Старшынёй журы «Спектакль тэатра драмы» стане вядомы беларускі драматург Аляксей Дудараў. Журы праграмы «Эксперыментальны тэатр» ўзначаліць дырэктар Цэнтра беларускай драматургіі Аляксандр Марчанка.

У праграме фестывалю таксама пазаконкурсныя праграмы, выставы, экскурсіі, чыткі п’ес беларускіх драматургаў, майстар-класы, круглыя сталы па пытаннях развіцця нацыянальнай драматургіі і тэатра. Білеты на конкурсныя і пазаконкурсныя паказы ўжо ў продажы.

VI Рэспубліканскі фестываль нацыянальнай драматургіі імя В. І. Дуніна-Марцінкевіча пройдзе ў Бабруйску 17-22 лістапада. Арганізатарамі выступаюць Магілёўскі абласны выканаўчы камітэт, Бабруйскі гарадскі выканаўчы камітэт, Міністэрства культуры.

БЕЛТА