За выхадныя ў рэгіёне адбылося 8 пажараў. Абышлося без гібелі людзей, як паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

Так, каля 8 гадзін раніцы 28 кастрычніка ў службу МНС звярнуліся жыхары пяціпавярховага жылога дома па вул. Карла Маркса ў Бабруйску. З вокнаў двухпакаёвай кватэры на пятым паверсе ішоў густы дым. Прыбыўшым выратавальнікам 66-гадовая гаспадыня паведаміла, што ўнутры застаўся яе 59-гадовы сажыцель. У шчыльным дыме на ложку падраздзяленнямі МНС быў знойдзены, эвакуяваны і шпіталізаваны мужчына з дыягназам «атручэнне прадуктамі гарэння». У выніку пажару пашкоджана маёмасць у пакоі, закураны сцены і столь у кватэры. Прычыну, па якой пачаўся пажар, яшчэ трэба будзе высветліць спецыялістам.

Дапамога ратавальнікаў спатрэбілася 27 кастрычніка і ў пошуку дзвюх жанчын, 1960 г. і 1965 гадоў нараджэння, якія заблудзіліся ў лясным масіве каля в. Разводава Клічаўскага раёна. А палове на другую ночы работнікамі МНС зніклыя былі знойдзены. На шчасце, жанчыны не пацярпелі.

Пра тое, што распальваць печ з дапамогай лёгкаўзгаральных вадкасцяў нельга, ведаюць многія жыхары прыватнага сектара. Вось толькі не ўсе выконваюць гэтыя правілы, што і прыводзіць да траўмаў. 29 кастрычніка ва ўстанову аховы здароўя з дыягназам «тэрмічны апёк полымем 3% цела (твар і вочы)» быў шпіталізаваны 25-гадовы магілёвец. Высветлілася, што апёкі мужчына атрымаў пры распальванні печы з дапамогай спіртавога раствору.