Бабруйск і італьянскі горад Іглезіяс сталі пабрацімамі, як паведамілі ў ганаровым консульстве Рэспублікі Беларусь у Кальяры (Італія).

Афіцыйнае падпісанне пагаднення аб пабрацімстве адбылося ў гарадской ратушы Іглезіяса падчас візіту ў горад дэлегацыі Бабруйскага гарвыканкама. У сярэднявечным зале Муніцыпальнага савета мэр Іглезіяса Эміліа Гар’яца і мэр Бабруйска Аляксандр Студнеў замацавалі ўстанаўленне сяброўскіх стасункаў. Пагадненне таксама атрымала поўную падтрымку ўрада аўтаномнага рэгіёна Сардзінія, які з’яўляецца самым актыўным італьянскім рэгіёнам у адносінах супрацоўніцтва з Рэспублікай Беларусь.

Новы горад – пабрацім Бабруйска – размешчаны на паўднёвым захадзе Сардзініі. З колькасцю насельніцтва каля 30 тыс. жыхароў ён з’яўляецца дзясятым па велічыні горадам на востраве. Падчас свайго знаходжання ў Італіі беларуская дэлегацыя сустрэлася з прадстаўнікамі ўстаноў і культурных асацыяцый Іглезіяса з мэтай развіцця кантактаў і магчымасці абменаў творчымі калектывамі. Бакі дамовіліся, што з 5 па 8 студзеня 2018 г. адзін з творчых калектываў Бабруйска будзе запрошаны сардзінскім бокам для правядзення серыі канцэртаў на востраве.

Акрамя таго, важнай стала сустрэча з вядучымі прадпрымальнікамі Іглезіяса, якія праявілі вялікую цікавасць да супрацоўніцтва з Бабруйскам і ў цэлым з Беларуссю. Па прапанове Аляксандра Студнева, да канца года дэлегацыя сардзінскіх прадпрымальнікаў з Іглезіяса ў суправаджэнні мэра горада наведае Бабруйск для знаёмства з эканамічнымі рэаліямі горада і вывучэння магчымых шляхоў супрацоўніцтва ў эканамічным сектары.

Госці таксама былі прыняты ў рэзідэнцыі прэзідэнта аўтаномнай вобласці Сардзінія, а затым сустрэліся з генеральным дырэктарам Асацыяцыі італьянскіх муніцыпалітэтаў ANCI – SARDEGNA – філіяла на Сардзініі. З нагоды візіту прадстаўнік муніцыпалітэта Сардзініі прапанаваў мэру Бабруйска пачаць сумеснае цеснае супрацоўніцтва і працу для таго, каб і іншыя беларускія і сардзінскія горады змаглі падпісаць новыя пагадненні аб партнёрстве.

Ганаровае консульства Беларусі ў Кальяры адзначае значнасць таго факту, што ў кантэксце мерапрыемстваў «2017 – Год беларускай культуры на Сардзініі» пагадненне пабрацімаў было падпісана менавіта з Бабруйскам – культурнай сталіцай Беларусі ў 2017 годзе.

БЕЛТА