Магілёў 11 лістапада прыме матч XI рэспубліканскіх спаборніцтваў па хакеі з шайбай сярод аматарскіх каманд на прызы Прэзідэнцкага спартыўнага клуба. Пра гэта карэспандэнту сайта паведамілі ва ўпраўленні спорту і турызму аблвыканкама.

Лядовы палац у 15.00 сустрэне каманды Магілёўскай і Брэсцкай абласцей і стане месцам гарачых баталій. Для дзвюх дружын гэты паядынак будзе першым на спаборніцтвах. Дарэчы, сапернік нашым хакеістам дастаўся няпросты: у мінулым сезоне зборная заваявала чацвёртае месца, саступіўшы ў паўфінале пераможцы турніру – камандзе Прэзідэнта Рэспублікі Беларусь. Другое месца заняла дружына Мінскай, трэцяе – Гомельскай вобласці.

У гэты ж дзень у Гродне сіламі памераюцца гаспадары арэны і дружына Мінскай вобласці, а ў Жлобіне – прадстаўнікі Гомельшчыны і Віцебшчыны.

Адзначым, што прэстыжныя спаборніцтвы стартавалі ў кастрычніку ў Мінску. У матчы-адкрыцці хакейная зборная Прэзідэнта на лёдзе «Чыжоўка-Арэны» аказалася мацнейшай за дружыну Мінскай вобласці. Пасля лідары перайгралі і Віцебшчыну. Матчы турніру адбудуцца таксама ў снежні, студзені, лютым. Завершыцца першынство ў сакавіку 2018 года.

«Рэспубліканскія спаборніцтвы па хакеі з шайбай сярод аматарскіх каманд на прызы Прэзідэнцкага спартыўнага клуба – адны з самых значных спаборніцтваў сярод аматараў спорту ў нашай краіне, – адзначылі суразмоўцы. – Высокі статус турніру тлумачыцца не толькі асабістым удзелам у ім кіраўніка дзяржавы. Ахоп усіх рэгіёнаў краіны, прадстаўнічыя склады каманд і дастаткова высокі для аматараў узровень майстэрства прыцягваюць усё больш і больш заўзятараў на трыбуны, а гэта значыць, што папулярнасць хакея і здаровага ладу жыцця ў краіне расце. Многія легендарныя ігракі з задавальненнем удзельнічаюць у рэспубліканскіх аматарскіх спаборніцтвах».