Больш за 20 тыс. электронных рэцэптаў ужо забяспечылі лекамі аптэкі Магілёўскай вобласці. Да 2020 года праграма інфарматызацыі прадугледжвае перавядзенне ўсёй медыцынскай дакументацыі на электронныя носьбіты.

Першымі сістэму электроннага рэцэпта ў рэгіёне ўкараняюць РУП «Фармацыя», цэнтральная паліклініка Магілёва і дыягнастычны цэнтр. Па запыце пацыента тут могуць аформіць пластыкавую картку – гэта і ёсць электронны рэцэпт. На яе заносіцца ўся інфармацыя пра лекі, іх прызначэнне і дазіроўку. Таксама па электронным носьбіце доктару або фармацэўту відаць, ці сапраўды ўладальнік купляў выпісаныя лекі.

Электронныя рэцэпты павінны ацаніць пацыенты з хранічнымі захворваннямі – так лічаць медыкі. Не прыйдзецца адседжваць чаргу да доктара толькі дзеля таго, каб выпісаць свой прэпарат. У перспектыве на электронныя рэцэпты павінны перайсці і прыватныя аптэкі. Пакуль папяровыя рэцэпты не адмяняюць.

ТРК «Магілёў»