XI абласныя Свята-Георгіеўскія агульнаадукацыйныя чытанні, прысвечаныя 300-годдзю з дня нараджэння архіепіскапа Магілёўскага і Беларускага, Свяціцеля Георгія Каніскага, адбудуцца ў горадзе на Дняпры 1 снежня. Пра гэта паведамілі ў Магілёўскім епархіяльным упраўленні.

Мерапрыемства пачнецца ў 10.00 на базе сацыяльна-гуманітарнага каледжа ўстановы адукацыі «Магілёўскі дзяржаўны ўніверсітэт імя А. А. Куляшова», які размяшчаецца па адрасе: вул. Камсамольская, д. 18 (пл. Арджанікідзэ, навучальны корпус універсітэта № 4, актавая зала, 3-ці паверх).

Падчас чытанняў будуць прадстаўлены даклады аб жыцці і свяціцельскім падзвіжніцтве Георгія Каніскага. Навукоўцы, святары і педагогі-практыкі падзеляцца вопытам у справе вывучэння спадчыны вялікага беларускага асветніка, а таксама ў пытаннях духоўна-маральнага выхавання падрастаючага пакалення. Пасля пленарнага пасяджэння адбудзецца круглы стол, а таксама семінар па праблемах праваслаўнага краязнаўства і майстар-клас па правядзенні куратарскай гадзіны «Георгій Каніскі – асветнік зямлі Беларускай».

З 9.00 да 13.00 у холе актавай залы размесціцца выстава навукова-метадычнай літаратуры і педагагічнага вопыту «Духоўнасць. Маральнасць. Асоба», на якой можна будзе пазнаёміцца з выданнямі, відэа- і аўдыяматэрыяламі на актуальныя тэмы педагогікі і праваслаўнай культуры.

Арганізатарам чытанняў выступае Магілёўскае епархіяльнае ўпраўленне сумесна з упраўленнем адукацыі Магілёўскага аблвыканкама і Магілёўскім дзяржаўным абласным інстытутам развіцця адукацыі.

Георгій Каніскі – архіепіскап, філосаф, вядомы грамадскі дзеяч. Нарадзіўся 20 лістапада 1717 года ва ўкраінскім Нежыне (Чарнігаўская губерня). Быў епіскапам Рускай праваслаўнай царквы, архіепіскапам Магілёўскім, Мсціслаўскім і Аршанскім. У 1993 годзе далучаны да ліку мясцовашанаваных святых Беларускага экзархата Рускай праваслаўнай царквы. Памёр 13 (24) лютага 1795 года ў Магілёве.