Жыхарак абласнога цэнтра запрашаюць прыняць удзел у навагоднім конкурсе «Галоўная Снягурка Магілёва – 2018». Пра гэта карэспандэнту сайта паведамілі ў аддзеле ідэалагічнай работы, культуры і па справах моладзі гарвыканкама.

Паводле слоў суразмоўцаў, заявіць пра сябе і пазмагацца за ганаровае званне могуць таленавітыя, разумныя, прыгожыя, смелыя і ўпэўненыя ў сабе дзяўчаты ад 16 да 30 гадоў.

Для гэтага канкурсанткам неабходна да 6 снежня падаць заяўку, а таксама кароткае відэа да 30 секунд на адрас: вул.Першамайская, 34, каб.3 або на электронную пошту moggck@list.ru,. У відэаматэрыяле ўдзельніца ў вобразе Снягуркі павінна коратка расказаць пра сябе і здзейсніць добры ўчынак. Прычым фільм можна зняць на відэакамеру, фотаапарат ці мабільны тэлефон. 7 снежня журы прагледзіць і абярэ найбольш цікавыя візітоўкі.

Другі этап адбудзецца з 8 па 15 снежня. Гледачы тэлеканала «Беларусь 4», а таксама карыстальнікі сацыяльных сетак убачаць найлепшыя відэафільмы першага тура. Вырашаць лёс канкурсантак будуць глядацкім галасаваннем.

Фінальнае шоу пройдзе ў Магілёўскім гарадскім цэнтры культуры і вольнага часу 22 снежня. Каб займець карону пераможцы, удзельніцам трэба праявіць сябе творчымі і эрудзіраванымі асобамі, годна вытрымаўшы ўсе выпрабаванні. Так, дзяўчатам неабходна будзе падрыхтаваць «Навагодні паказ», нумар мастацкай самадзейнасці, а таксама «Арыгінальны навагодні падарунак». Падарункі, якія канкурсанткі змайструюць сваімі рукамі, будуць перададзены ў дзіцячы сацыяльны прытулак Магілёўскага гарадскога сацыяльна-педагагічнага цэнтра.

Па выніках трох конкурсаў журы вызначыць ўладальніц узнагарод у спецыяльных намінацыях і пераможцу. «Галоўная Снягурка Магілёва – 2018» атрымае грашовы прыз, а таксама будзе ўдастоена ганаровага права выканаць ролю галоўнай Снягуркі ў гарадскім навагоднім шэсці 25 снежня. Акрамя таго, прызёры 23 снежня прымуць удзел у тэматычным свяце на плошчы Зорак.

Арганізатарамі конкурсу выступаюць аддзел ідэалагічнай работы, культуры і па справах моладзі Магілёўскага гарвыканкама, Магілёўскі гарадскі Цэнтр культуры і вольнага часу, Тэлерадыёкампанія «Магілёў».

Палажэнне конкурсу «Галоўная Снягурка Магілёва – 2018»