Мастацкую маркіраваную картку выпусцяць да 100-годдзя вядомага вучонага-краязнаўцы Пятра Лярскага. Пра гэта паведаміў прафесар кафедры прыродазнаўства факультэта матэматыкі і прыродазнаўства Магілёўскага дзяржаўнага ўніверсітэта імя А. А. Куляшова Ігар Шаруха.

Картку распрацавалі ў выдавецкім цэнтры «Марка» вядучым дызайнерам РУП «Белпошта» Яўгеніяй Бядонік. Выпуск прадукцыі ў абарот тыражом у 20 тыс. экзэмпляраў запланаваны на 2 студзеня 2018 года.

Цэнтральнае месца на картцы займае аўтограф і партрэт Пятра Лярскага. Сама карціна, напісаная магілёўскім мастаком Дзмітрыем Пухоўскім, перададзена Магілёўскім аддзелам ГА «Беларускае геаграфічнае таварыства» у СШ №21 горада Магілёва, якая носіць імя навукоўцы. На картцы таксама знайшлося месца малюнку асноўных падручнікаў Лярскага: «Прыродазнаўства», «Дапаможнік па краязнаўстве», «Прырода Магілёўскай вобласці» і інш.

Прэзентацыю мастацкай маркіраванай карткі плануецца правесці 19 студзеня 2018 года на адкрыцці мемарыяльнай дошкі ў гонар Пятра Лярскага. Памятны знак размесціцца на будынку корпуса ўніверсітэта МДУ імя А. А. Куляшова №3 па вул. Першамайскай, дзе калісьці працаваў краязнаўца.

Нагадаем: з прапановай увекавечыць памяць выдатнага вучонага да гарадскіх уладаў звярнулася адміністрацыя ўніверсітэта. Ініцыятыву падтрымала гарадская тапанімічная камісія. Пасля адбылося абмеркаванне і ўзгадненне з мясцовым кіраваннем архітэктуры і горадабудаўніцтва. Магілёўскі гарвыканкам ужо атрымаў дазвол на выраб і ўсталяванне мемарыяльнай дошкі ад Міністэрства культуры Беларусі. Аўтарам памятнага знака выступіць магілёўскі скульптар Андрэй Вараб’ёў.

Пётр Лярскі нарадзіўся ў вёсцы Рымінка Чавускага раёна, скончыў геаграфічны факультэт педагагічнага інстытута. У гады Вялікай Айчыннай вайны ваяваў у спецяльным партызанскім палку пад камандаваннем Героя Савецкага Саюза Сяргея Грышына. Пасля вызвалення Беларусі працаваў дырэктарам Асінаўскай сярэдняй школы, а ў канцы 1944 года па запрашэнні перайшоў на геаграфічны факультэт педагагічнага інстытута (цяпер МДУ імя Аркадзя Куляшова). Займаўся выкладчыцкай і навуковай дзейнасцю. Разам з М. С. Ратабыльскім ў 1958 годзе падрыхтаваў і выдаў падручнік «Геаграфія» для студэнтаў педагагічных факультэтаў, які разышоўся па ўсім Савецкім Саюзе і некалькі разоў перавыдаваўся. Ён таксама аўтар выданняў «Землязнаўства і краязнаўства», «Дапаможнік па краязнаўстве». У 70-я гады ўбачыла святло серыя яго школьных падручнікаў па курсе «Прыродазнаўства». Кнігі перавыдаваліся са зменамі і дапаўненнямі аж да сярэдзіны 90-х гадоў. У 2005 годзе пад яго аўтарствам была выдадзена ўнікальная ў сваім родзе кніга – «Прырода Магілёўскай вобласці».

Пётр Лярскі быў у складзе таварыства аховы прыроды, геаграфічным таварыстве СССР, Беларускім геаграфічным грамадстве. У 2006 годзе стаў лаўрэатам прэміі Магілёўскага аблвыканкама «Чалавек года». Памёр 25 кастрычніка 2013 года. Пахаваны на Грузаўскіх могілках у Магілёве.