Рэдакцыя раённай газеты «Ударны фронт» запусціла цалкам абноўлены партал ШклоўІнфа на ранейшым адрасе shklovinfo.by. Зараз гэта не толькі навінавы мультымедыйны сайт, але і шматфункцыянальны Інтэрнэт-рэсурс, расказаў карэспандэнту сайта галоўны рэдактар выдання Павал Савельеў.

«Апрача выканання нашай галоўнай задачы – трымаць жыхароў раёна ў курсе ўсіх падзей, якія адбываюцца на Шклоўшчыне, – мы паспрабавалі зрабіць ШклоўІнфа максімальна карысным для наведвальнікаў, – пракаментаваў суразмоўца. – Да прыкладу, удасканалілі каталог вакансій і рэзюмэ. Сістэма пошуку працы і супрацоўнікаў пабудавана па прынцыпе перадавых сайтаў у гэтай сферы. Укаранёна купля PDF-версіі нумароў праз сістэму АРІП, асобны віджэт-блок адведзены дзейнасці «Тэлекампанія «Шклоў»».

Акрамя таго, на новым партале наведвальнікі змогуць пакідаць каментары, рэгістравацца і весці перапіску адзін з адным. У юрыдычных асоб і прадпрымальнікаў з’явілася магчымасць самастойна стварыць прэзентацыйную старонку сваёй арганізацыі з даданнем фотаальбомаў выпускаемай прадукцыі або паслуг у спецыяльным каталогу. Размясціць прыватную аб’яву на партале стала цяпер прасцей простага.

«Ударны фронт» з’яўляецца адным з буйных рэгіянальных выданняў Магілёўскай вобласці. Яго тыраж на дадзены момант складае больш за 6 тыс. экзэмпляраў.