Працягваецца збор сродкаў на рэканструкцыю і рэстаўрацыю збудаванняў Бабруйскай крэпасці. Пра гэта паведамілі ў Бабруйскім гарвыканкаме.

Для ўнікальнага помніка гісторыі, культуры і ваеннага мастацтва найважнейшай умовай з’яўляецца захаванне цэласнасці, адзначылі суразмоўцы. З цягам часу і пад уплывам прыродных умоў частка абарончых збудаванняў аб’екта зведала пагібельныя змены і патрабуе неадкладнага правядзення работ па іх рамонце, рэканструкцыі і кансервацыі. Затрымка ў аднаўленні можа прывесці да яшчэ большай яго страты.

У цяперашні час у крэпасці захаваныя дзевяць рэдзюітаў уваходных і выходных плацдармаў, казематаваны бастыён, люнет, вежа Апермана, каля дваццаці будынкаў і збудаванняў адміністрацыйна-бытавой зоны, у тым ліку і дом каменданта, фрагменты земляных і казематаваных умацаванняў форта «Фрыдрых Вільгельм».

З мэтай збору сродкаў для правядзення неабходных работ па кансервацыі і рэстаўрацыі адкрыты дабрачынны рахунак №BY77AKBB36420977221977100000 ў філіяле 703 ААТ «АСБ Беларусбанк» ў г. Бабруйску BIC AKBBBY21703.

Рэканструкцыя і рэстаўрацыя Бабруйскай крэпасці будзе спрыяць развіццю ўязнога турызму, далейшаму далучэнню да вывучэння двухсотгадовай гісторыі крэпасці на Бярэзіне гасцямі і жыхарамі горада, падкрэслілі ў гарвыканкаме.