Спецыялісты з 13 краін з’едуцца ў Горкі на міжнародную навуковую канферэнцыю па аквакультуры сярод маладых навукоўцаў. Пра гэта паведамілі ў Беларускай дзяржаўнай сельскагаспадарчай акадэміі.

Форум адбудзецца 28 лістапада – 1 снежня на базе кафедры іхтыялогіі і рыбаводства найбуйнейшай шматпрофільнай вышэйшай навучальнай установы аграпрамысловага кірунку сярод краін СНД. Асноўныя напрамкі, па якіх будзе будавацца работа канферэнцыі, – рыбная гаспадарка і аквакультура, іхтыялогія, водныя біялагічныя рэсурсы.

Арганізатарамі мерапрыемства выступаюць БДСГА сумесна з cеткай цэнтраў аквакультуры ў Цэнтральнай і Усходняй Еўропе ( Венгрыя).

У час форуму ў раённым цэнтры таксама пройдзе кірмаш-продаж «Рыбныя Горкі 2017», які будзе працаваць 29 лістапада з 9.00 да 17.00 на пляцоўцы Палаца культуры акадэміі.

Рыбакамбінат «Любань», рыбгасы «Волма» і «Свіслач», ААТ «Альба», КВУП «Фарэлевая гаспадарка «Лахва»», прадставяць пакупнікам рыбу і рыбную прадукцыю ўласнай вытворчасці.