У прыватным жылым доме ў в. Слабодка Шклоўскага раёна адбыўся разрыў ацяпляльнага катла на цвёрдым паліве. Пра гэта карэспандэнту сайта паведаміла старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

Здарэнне адбылося днём 24 лістапада ў кватэры №1, якая належыць 36-гадоваму мясцоваму жыхару. У выніку разрыву пашкоджаны кацёл, комін, маёмасць у прыбудове, адбылося зрушэнне верхняй часткі сцяны прыбудовы вонкі на адлегласць да 20 см. На момант надзвычайнага здарэння гаспадароў у хаце не было, затое былі іх суседзі з кватэры №2: 64-гадовая пенсіянерка з мужам . На шчасце, яны не пацярпелі. Дом прыдатны для пражывання. Папярэдняя прычына таго, што здарылася – адсутнасць цыркуляцыі цепланосьбіта.

Таксама ва ўстанову аховы здароўя 25 лістапада з апёкамі 7% цела была шпіталізавана 25-гадовая жыхарка в. Вялікая Зімніца Слаўгарадскага раёна. Траўмы дзяўчына атрымала ў выніку неасцярожнага абыходжання з агнём пры распальванні металічнай печы з дапамогай гаручай вадкасці.