Натарыусы Магілёўскай вобласці 1 снежня бясплатна пракансультуюць грамадзян па пытаннях, звязаных з правядзеннем натарыяльных дзеянняў. Пра гэта карэспандэнту сайта паведаміла інспектар па кадрах Магілёўскай абласной натарыяльнай палаты Марына Думаронак.

Удзел у акцыі, прымеркаванай да святкавання Дня юрыста, які адзначаецца ў Беларусі ў першую нядзелю снежня, прымуць усе натарыяльныя канторы і натарыяльныя бюро рэгіёна.

Паводле слоў Марыны Думаронак, на працягу працоўнага дня любы жадаючы можа звярнуцца па кансультацыю да натарыуса па пытаннях, якія ўваходзяць у яго кампетэнцыю, у тым ліку па пытаннях афармлення спадчынных правоў, складання завяшчанняў, шлюбных дагавораў, адчужэння нерухомасці і здзяйснення выканаўчых надпісаў.

Поўны спіс натарыяльных кантор і натарыяльных бюро, а таксама час іх працы можна ўдакладніць на сайце Беларускай натарыяльнай палаты ў раздзеле «Знайсці натарыуса».