Урачыстая цырымонія ўзнагароджання фіналістаў і пераможцаў конкурсу # ЛюблюГеаграфію адбылася ў Мінску. Найлепшым стаў прадстаўнік Свенскай сярэдняй школы Слаўгарадскага раёна Вячаслаў Фёдараў, паведамляе інфармацыйна-аналітычны партал Саюзнай дзяржавы.

Выкладчык прадставіў урок на тэму «Геаграфія Саюзнага турызму: Расія – Беларусь». Вячаслаў Фёдараў адзначыў, што заўсёды захапляўся прыгажосцю прыроды як роднага краю, так і ўсіх абласцей, рэгіёнаў Саюзнай дзяржавы. «Рады, што магу расказваць пра гэта на ўроках вучням, і ўдзячны Пастаяннаму Камітэту Саюзнай дзяржавы за магчымасць падзяліцца сваім вопытам з грамадскасцю», – адзначыў ён.

Усяго на конкурс паступіла 105 заявак, але толькі 88 былі дапушчаны да разгляду членамі журы, з іх 43 – ад беларускіх настаўнікаў, 46 – ад расійскіх. Удзельнікамі былі прадстаўлены розныя катэгорыі навучальных устаноў: сярэднія школы, ліцэі, гімназіі, дзіцячыя сады – базавыя школы, дзіцячыя сады – сярэднія школы, кадэцкія корпусы, спецыялізаваныя навучальныя ўстановы. У фінал выйшлі 10 чалавек, 5 настаўнікаў з Беларусі і 5 – з Расіі.

Спаборніцтва праводзілася па ініцыятыве Пастаяннага Камітэта Саюзнай дзяржавы пры падтрымцы Міністэрстваў адукацыі Беларусі і Расіі, Беларускага і Расійскага геаграфічных таварыстваў. Мэта праекта – падтрымаць сучасныя фарматы правядзення ў сярэдніх школах, кадэцкіх карпусах, сувораўскіх вучылішчах урокаў па геаграфіі, спрыяць станаўленню асобы маладых грамадзян Саюзнай дзяржавы на аснове пераемнасці агульных культурна-гістарычных каштоўнасцей беларускага і расійскага народаў. У 2015-2016 гадах з поспехам былі праведзены аналагічныя конкурсы па гісторыі і літаратуры.