Напярэдадні Сусветнага дня барацьбы са СНІДам Магілёўская вобласць далучылася да міжнароднай кампаніі «Маё здароўе, маё права». Пра гэта карэспандэнту сайта паведамілі ў Магілёўскім абласным цэнтры гігіены, эпідэміялогіі і грамадскага здароўя.

У транспарце праходзіць праект «Няхай праўду пра ВІЧ пачуе кожны!», «Даведайся пра свой статус – прайдзі тэст на ВІЧ!». Для забеспячэння найбольшага ахопу насельніцтва інфармацыяй аб праблеме ВІЧ-інфекцыі ў рэгіёне арганізаваны акцыі «Цягнік даверу» для вучнёўскай і студэнцкай моладзі, «Ведаць – усвядоміць – змяніць» для выхаванцаў і трэнерска-выкладчыцкага саставу Магілёўскага дзяржаўнага вучылішча алімпійскага рэзерву, «ВІЧ-граматнасць – надзейная абарона насельніцтва» на прамысловых прадпрыемствах i iнш.

У Магілёўскай вобласці на 1 лістапада 2017 года было зарэгiстравана 1 516 выпадкаў ВІЧ-інфекцыі (паказчык распаўсюджанасці склаў 121,1 на 100 тыс. насельніцтва). За 10 месяцаў 2017 года выяўлена 140 пацыентаў, 28,6% з іх прайшлі тэставанне добраахвотна. Захоўваецца на высокім узроўні доля палавога шляху перадачы віруса: за бягучы перыяд часу ён склаў – 90,1%. Сярод асоб з усталяваным ВІЧ-статусам пераважае ўзроставая група старэйшых за 35 гадоў (55,7%).

Важнай часткай прафілактыкі ВІЧ-інфекцыі сёння з’яўляецца своечасовае тэставанне, паколькі ранняя дыягностыка спрыяе больш эфектыўнаму лячэнню, павышэнню якасці жыцця людзей, якія жывуць з ВІЧ, памяншэння фактараў рызыкі перадачы віруса іншым, адзначылі суразмоўцы. Магчымасць атрымаць кансультацыю і прайсці абследаванне на ВІЧ, у тым ліку ананімна, ёсць у любой лячэбна-прафілактычнай установе рэгіёна, а таксама ў аддзеле прафілактыкі ВІЧ / СНІД установы аховы здароўя «Магілёўскі абласны цэнтр гігіены, эпідэміялогіі і грамадскага здароўя» (адрас: г. Магілёў , вул.Першамайская, 114, тэлефон «гарачай лініі» – 8 (0222) 71-65-83). Акрамя таго, у Магілёўскай абласной інфекцыйнай бальніцы працуе кансультатыўна-дыягнастычны кабінет. Тут акажуць дапамогу ў пытаннях ВІЧ / СНІД, прызначэння і выдачы медпрэпаратаў для правядзення посткантактнай прафілактыкі ВІЧ-інфекцыі ў выпадку аварыйнай сітуацыі.

Сусветны дзень барацьбы са СНІДам стаў штогадовай падзеяй у большасці краін свету і адзначаецца 1 снежня з 1988 года. У гэты дзень людзі аб’ядноўваюцца ў імкненні павысіць дасведчанасць аб ВІЧ-інфекцыі і падтрымаць у знак салідарнасці тых, хто жыве з ВІЧ. Кожны год сусветная кампанія праходзіць пад дэвізам, якія адлюстроўваюць аспекты эпідэміі і напрамкі прафілактычнага ўмяшання. У 2017-м яна прысвечана тэме «Права на здароўе».