Каля 150 тыс. юных жыхароў Магілёўшчыны стануць удзельнікамі навагодніх мерапрыемстваў, арганізаваных установамі адукацыі, арганізацыямі і грамадскімі аб’яднаннямі. Пра гэта карэспандэнту сайта паведамілі ва ўпраўленні адукацыі аблвыканкама.

Святы пройдуць у рамках дабрачыннай акцыі «Нашы дзеці», якая стартуе 11 снежня і будзе працягвацца па 10 студзеня.

З 22 па 30 снежня запланаваны мерапрыемствы з удзелам старшыні аблвыканкама, яго намеснікаў, кіраўнікоў гарадскіх і раённых выканаўчых камітэтаў, адміністрацый раёнаў Бабруйска і Магілёва, структурных падраздзяленняў аблвыканкама і арганізацый рэгіёна. Госці збіраюцца наведаць 54 дзіцячыя дамы сямейнага тыпу, 23 цэнтры карэкцыйна-развіваючага навучання і рэабілітацыі, 11 дзіцячых сацыяльных прытулкаў, 10 інтэрнатных устаноў абласнога падпарадкавання.

Традыцыйна напярэдадні Новага года праходзіць Калядны кадэцкі баль. У гэтым годзе ён адбудзецца 18 снежня.

Галоўная рэгіянальная навагодняя ўрачыстасць запланавана на 27 снежня. У абласны цэнтр творчасці запросяць каля 500 хлопчыкаў і дзяўчынак. У іх ліку – адораныя і таленавітыя дзеці, пераможцы алімпіяд і творчых конкурсаў, актывісты піянерскага руху, дзеці-сіроты і дзеці, якія засталіся без апекі бацькоў, выхаванцы кадэцкага вучылішча. Ім пакажуць казку-мюзікл «Кот у ботах» і ўручаць падарункі ад губернатара. Не застануцца без віншаванняў і пачастункаў юныя жыхары Магілёўшчыны, якія знаходзяцца на лячэнні ў стацыянарных гарадскіх і раённых бальніцах. Да маленькіх пацыентаў прыйдуць госці з прысмакамі і пажадаюць ім найхутчэйшага выздараўлення.

Акрамя таго, 21-22 снежня 100 дзяцей з Магілёўскай вобласці стане гасцямі дабрачыннага навагодняга свята з удзелам кіраўніка дзяржавы Аляксандра Лукашэнкі ў Палацы Рэспублікі горада Мінска.

За кошт сродкаў абласнога, гарадскіх і раённых бюджэтаў у рамках акцыі «Нашы дзеці» малыя атрымаюць падарункі да Новага года. Запланавана набыццё прысмакаў для выхаванцаў устаноў дашкольнай адукацыі, дзіцячых сацыяльных прытулкаў і дамоў сямейнага тыпу, цэнтраў карэкцыйна-развіваючага навучання і рэабілітацыі, дзяцей-інвалідаў, навучэнцаў пачатковых класаў устаноў агульнай сярэдняй адукацыі, спецыяльных і дапаможных школ, дзяцей-сірот і дзяцей, якія засталіся без апекі бацькоў усіх тыпаў устаноў адукацыі, дзяцей са шматдзетных і малазабяспечаных сем’яў. Таксама будуць закуплены падарункі з прыцягненнем спонсарскіх сродкаў, грошай грамадскіх арганізацый і інш.

Часткай акцыі стане тэлемарафон «Сагрэем дзіцячыя сэрцы», які арганізуе Магілёўскае абласное аддзяленне РДА «Беларускі дзіцячы фонд» пры падтрымцы Магілёўскага аблвыканкама.