Беларус Ігар Бокій заваяваў пяць залатых узнагарод на чэмпіянаце свету па плаванні сярод паралімпійцаў, які праходзіць у Мехіка.

У чацвёрты дзень спаборніцтваў Ігар Бокій у катэгорыі S13 здолеў перамагчы на дыстанцыях 50 м вольным стылем – 23,53 сек і 100 м брасам – 1 мін. 06,17 сек. Гэтыя залатыя ўзнагароды для беларуса сталі пятымі на турніры ў Мехіка. Раней ён стаў чэмпіёнам на дыстанцыях 100 м на спіне, 100 м батэрфляем і 400 м вольным стылем. На рахунку беларусаў у чацвёрты дзень сусветнага форуму яшчэ дзве сярэбраныя ўзнагароды. На другую прыступку п’едэстала гонару ўзняўся Рыгор Зудзілаў на дыстанцыі 400 м вольным стылем, яшчэ адзін медаль у беларускі Аляксандры Свадкоўскай, якая заняла другое месца на 100 м брасам.

Усяго на рахунку беларускай зборнай па плаванні на чэмпіянаце свету сярод паралімпійцаў пасля чатырох спаборніцкіх дзён ужо 13 узнагарод (сем залатых, пяць сярэбраных і адзін бронзавы медалі), у медальным заліку яна займае шостае месца. Лідзіруюць паралімпійцы Кітая – 33 ўзнагароды.

Чэмпіянат свету па плаванні сярод спартсменаў з абмежаванымі магчымасцямі працягнецца ў Мехіка да 7 снежня.

БЕЛТА