РУП «Завод газетнай паперы» пачало пастаўку прадукцыі ў Кітай, паведаміў першы намеснік дырэктара прадпрыемства Леанід Шкляр.

«З кітайскімі партнёрамі мы дамовіліся аб пастаўках штомесяц 200 т газетнай паперы, хоць яны гатовы забраць і ўвесь аб’ём выпускаемай намі прадукцыі. Але з пункту гледжання эканамічнай бяспекі нам гэта не падыходзіць. Калі попыт у Кітаі на паперу раптам скончыцца, праблемы ўжо будуць у нас. Таму мы стараемся забяспечыць збалансаванасць знешняга гандлю і вядзём планамерную дыверсіфікацыю экспарту», – растлумачыў першы намеснік дырэктара.

Больш чым дзве трэці выпускаемай прадукцыі прадпрыемства сёння рэалізуе за межы краіны. Асноўнымі імпарцёрамі газетнай паперы, акрамя Кітая, з’яўляюцца Украіна, Малдова, Венгрыя, Польшча, Сербія, Пакістан. За студзень-кастрычнік бягучага года тэмп росту экспарту ў параўнанні з аналагічным перыядам мінулага года склаў 113%.

Практычна ўсе вытворчасці завода загружаны пад поўную магутнасць, а філіял «Домабудаванне», які спецыялізуецца на выпуску піламатэрыялаў, паганажных вырабаў, клеенага бруса, каркасна-шчытавых дамоў і дамоў з клеенага бруса, працуе ў чатыры змены і без выхадных.

РУП «Завод газетнай паперы» пачало працу ў 2006 годзе. Прадпрыемства спецыялізуецца на выпуску высакаякаснай газетнай і афсетнай паперы. На сённяшні дзень у прадпрыемства два філіялы – «Домабудаванне» і папяровая фабрыка «Спартак». Магутнасць вытворчасці складае 40 тыс. т паперы ў год, у тым ліку 20 тыс. т стандартнай газетнай паперы і 20 тыс. т лёгкамелаванай паперы.

БЕЛТА