Латвійская дэлегацыя наведае Магілёў 12-14 снежня. Візіт адбудзецца ў рамках рэалізацыі дамовы аб міжнародным супрацоўніцтве ў сферы культуры і мастацтва паміж Магілёўскай дзяржаўнай гімназіяй-каледжам мастацтваў і Наўенскай музычнай і мастацкай школай, паведамілі карэспандэнту сайта ў гарвыканкаме.

Узначаліць дэлегацыю гасцей віцэ-прэзідэнт міжнароднай асацыяцыі музычных школ «Con Anima», дырэктар прэстыжных міжнародных фестываляў і конкурсаў, член міжнароднай канфедэрацыі акардэаністаў Сподрыс Качанс.

Праграмай візіту запланаваны майстар-класы вядучых педагогаў гімназіі-каледжа мастацтваў, круглы стол «Праблемы прафесійнай падрыхтоўкі музыкантаў-выканаўцаў на сучасным этапе». Таксама 13 снежня ў 11.00 пачнецца канцэрт-прэзентацыя гімназіі-каледжа мастацтваў з удзелам салістаў, аркестравых і харавых калектываў установы.