Сем пажараў адбылося за выхадныя ў Магілёўскай вобласці. Адзін з іх скончыўся гібеллю, паведаміла карэспандэнту сайта старшы інспектар Цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

Так, днём 10 студзеня па не ўстаноўленай пакуль прычыне загарэўся жылы дом у в. Боні Касцюковіцкага раёна. Паколькі дом размешчаны на ўскраіне вёскі, мясцовыя жыхары выявілі ўзгаранне, калі дах ўжо палаў. Агонь не пакінуў шанцаў на выратаванне 73-гадовага гаспадара – яго без прыкмет жыцця знайшлі на канапе. У выніку пажару знішчаны дах, перакрыцце, маёмасць у доме, пашкоджаны сцены дома.

Сапраўдны вогненны перапалох адбыўся 8 студзеня ўвечары ў пяціпавярховым жылым доме па вул. Ульянаўскай у Бабруйску. У адсутнасць 42-гадовай гаспадыні загарэлася двухпакаёвая кватэра на чацвёртым паверсе. Трывогу забілі суседзі, у кватэры якіх ужо пачаў прасочвацца дым. Ратавальнікі аператыўна ўтаймавалі стыхію. І ўсё ж агонь ужо паспеў сур’ёзна пагаспадарыць: знішчана канапа, пашкоджана маёмасць, закураны сцены па ўсёй плошчы. Як мяркуецца, прычына пажару – неасцярожнасць пры курэнні.