У Магілёўскай вобласці мінімізавана колькасць месцаў, забароненых для агітацыі на мясцовых выбарах. Пра гэта паведаміў старшыня Магілёўскай абласной выбарчай камісіі па выбарах дэпутатаў мясцовых Саветаў дэпутатаў 28-га склікання Валерый Берастаў.

«Мы вывучылі і прааналізавалі прынятыя гаррайвыканкамамі рашэнні па вызначэнні месцаў, забароненых для агітацыі ў падтрымку кандыдатаў у дэпутаты мясцовых Саветаў, і прыйшлі да высновы, што такіх месцаў стала значна менш у параўнанні з папярэднімі мясцовымі выбарамі. У асноўным забаронены для агітацыі месцы каля будынкаў мясцовых прадстаўнічых, распарадчых і выканаўчых органаў, судоў, органаў пракуратуры, тэрыторый і арганізацый, якія забяспечваюць абараназдольнасць, бяспеку арганізацый. Такія дэмакратычныя ўмовы на месцах дадуць кандыдатам у дэпутаты мясцовых Саветаў больш магчымасцяў для агітацыі і зробяць выбары ў мясцовыя Саветы больш адкрытымі і празрыстымі», – лічыць Валерый Берастаў.

Паводле яго слоў, выбарчая кампанія ў Магілёўскай вобласці праходзіць у спакойнай, дзелавой абстаноўцы і па зацверджаным Цэнтрвыбаркамам каляндарным графіку. У Магілёўскай абласной выбарчай камісіі на сёння акрэдытаваны два назіральнікі за мясцовымі выбарамі. Гэта прадстаўнікі РПГА «Беларускі Хельсінкскі камітэт» і ГА БРСМ. З месцаў ад выбарчых камісій інфармацыі аб акрэдытацыі назіральнікаў не паступала. «Але такі паказчык актыўнасці ў наглядальным працэсе характэрны толькі для пачатку выбарчага працэсу. Таму мы чакаем у найбліжэйшы час росту колькасці назіральнікаў і іх высокай актыўнасці, як гэта адбывалася і на папярэдніх выбарах у мясцовыя Саветы», – сказаў Валерый Берастаў.

Ён таксама звярнуў увагу, што на першых этапах мясцовых выбараў няма якіх-небудзь прэтэнзій і скаргаў за ходам выбарчага працэсу. «Такія заявы не паступалі ні ў тэрытарыяльныя, ні ў акруговыя выбарчыя камісіі», – канстатаваў Валерый Берастаў.

БЕЛТА