У Магілёўскай вобласці пададзена 4 158 заяў на рэгістрацыю ініцыятыўных груп па вылучэнні кандыдатаў у дэпутаты мясцовых Саветаў дэпутатаў 28-га склікання. Пра гэта паведамілі ў Магілёўскай абласной выбарчай камісіі.

Па словах суразмоўцаў, як і загадвае заканадаўства, выбарчыя камісіі пачалі ажыццяўляць прыём заяў з моманту іх стварэння і па 14 снежня ўключна.

У выніку выказалі жаданне праводзіць збор подпісаў у падтрымку сваіх кандыдатаў у дэпутаты абласнога Савета дэпутатаў 122 ініцыятыўныя групы, раённых Саветаў – 990, гарадскіх – 194, сельскіх – 2 852. Пры гэтым падтрымкай ініцыятыўных груп заручыўся 41 кандыдат у дэпутаты, якія з’яўляюцца сябрамі палітычных партый. Найбольш актыўнымі былі прадстаўнікі Камуністычнай партыі Беларусі і Аб’яднанай грамадзянскай партыі.

Вылучэнне кандыдатаў у дэпутаты будзе праходзіць па 8 студзеня 2018 года ўключна. Акрамя збору подпісаў сябрамі ініцыятыўных груп, вылучаць кандыдатаў у дэпутаты могуць на дадзеным этапе палітычныя партыі і працоўныя калектывы.

Рэгістрацыя кандыдатаў у дэпутаты выбарчымі камісіямі пройдзе з 9 па 18 студзеня 2018 года.

У Магілёўскай вобласці працуюць 55 акруговых выбарчых камісій па выбарах дэпутатаў аблсавета, 175 тэрытарыяльных камісій па выбарах дэпутатаў раённых, гарадскіх, сельскіх Саветаў дэпутатаў. Дэпутацкі корпус 28-га склікання мяркуецца сфарміраваць у складзе 2 556 чалавек, з іх 55 – дэпутаты аблсавета.