Цяперашняя выбарчая кампанія праходзіць пакуль больш актыўна, чым мясцовыя выбары чатыры гады таму. На гэта звярнула ўвагу старшыня Цэнтрвыбаркама Беларусі Лідзія Ярмошына, адказваючы на пытанні журналістаў перад пачаткам семінара-нарады са старшынямі і сакратарамі тэрытарыяльных і акруговых выбарчых камісій, кіраўнікамі мясцовых выканаўчых і распарадчых органаў у Магілёве.

Па словах Лідзіі Ярмошынай, ініцыятыўных груп зарэгістравана па рэгіёнах прыблізна ў 1,5-2 разы больш, чым у папярэднюю кампанію. Сярод вылучэнцаў з’явілася шмат новых асоб і прозвішчаў. Павялічылася ў выбаркамах і колькасць прадстаўнікоў аб’яднанняў і палітычных партый, адзначаецца іх вялікая актыўнасць пры вылучэнні і зборы подпісаў. «Гэта ўсё будзе спрыяць таму, што павялічыцца яўка выбаршчыкаў, і, цалкам магчыма, выбарчая кампанія будзе праходзіць больш жыва і цікава, чым звычайна», – адзначыла яна.

Лідзія Ярмошына дадала, што ўжо на ранняй стадыі вылучэння такія грамадскія аб’яднанні, як «Белая Русь», прафсаюзы, БРСМ актыўна выкарыстоўваюць агітацыйныя метады падчас збору подпісаў. Так, у Мінску дастаткова многа пікетаў са сцягамі, партрэтамі асоб, якія вылучаюцца кандыдатамі ў дэпутаты, – таго, што раней назіралася толькі на парламенцкіх выбарах.

У гэту выбарчую кампанію будуць выкарыстоўвацца дэмакратычныя напрацоўкі, якія ўжываліся раней пры прэзідэнцкіх і парламенцкіх выбарах, падкрэсліла Лідзія Ярмошына. Перш за ўсё, яны закранулі парадак утварэння выбарчых камісій. Значна больш дэмакратычныя рашэнні прыняты мясцовымі выканаўчымі органамі ўлады з нагоды адвядзення месцаў для збору подпісаў. Таксама ідзе актыўнае інфармаванне насельніцтва, у тым ліку праз інтэрнэт, выкарыстанне якога на папярэдніх мясцовых выбарах было на высокім узроўні.

Старшыня ЦВК праінфармавала ўдзельнікаў семінара аб выніках першых этапаў выбарчай кампаніі. У краіне сфарміравана 1309 тэрытарыяльных выбарчых камісій, 361 акруговая выбарчая камісія. Фарміраванне ўчастковых выбаркамаў пачнецца пазней і ў адпаведнасці з каляндарным планам павінна быць завершана не пазней за 3 студзеня 2018 года. Акрамя таго, у Беларусі для правядзення мясцовых выбараў у 2018 годзе ўтворана 5 869 участкаў для галасавання.

Выбары ў мясцовыя Саветы дэпутатаў 28-га склікання пройдуць у Беларусі 18 лютага. Па 8 студзеня ўключна працягнецца вылучэнне кандыдатаў у дэпутаты. Зрабіць гэта можна трыма традыцыйнымі спосабамі – шляхам збору подпісаў, ад палітычных партый і ад працоўных калектываў. Грамадзянін мае права вылучацца па адной з выбарчых акругаў у мясцовы Савет кожнага тэрытарыяльнага ўзроўню (у абласны, гарадскі, раённы і сельскі).

Усяго на выбарах 18 лютага ў Магілёўскай вобласці трэба будзе абраць 2 556 дэпутатаў, у тым ліку 1 746 у сельскія, 80 – у гарадскія, 675 – у раённыя Саветы, а таксама 55 дэпутатаў у абласны Савет.