Вядомы спявак, удзельнік конкурсу «Еўрабачанне» ад Беларусі Руслан Аляхно ў сакавіку мае намер правесці дабрачынную акцыю па зборы сродкаў для дзіцячай клінічнай бальніцы Бабруйска. Пра гэта артыст заявіў на сваім творчым вечары, які адбыўся ў Дзелавым і культурным комплексе пасольства Беларусі ў Расіі, паведамілі ў прэс-службе дыппрадстаўніцтва.

Па словах Руслана Аляхно, у акцыі запланаваны ўдзел вядомых беларускіх і расійскіх артыстаў.

Падчас канцэрту ў Дзелавым і культурным комплексе, дзе прагучалі найлепшыя кампазіцыі артыста за апошнія гады, Надзвычайны і Паўнамоцны Пасол Беларусі ў Расіі Ігар Петрышэнка ўручыў спеваку падзяку дыпмісіі. Дыпламат адзначыў, што творчасць Руслана Аляхно служыць ідэі яднання брацкіх народаў і ўносіць значны ўклад у развіццё і ўмацаванне беларуска-расійскіх культурных сувязяў.

У прэс-службе нагадалі, што артыст рэгулярна прымае ўдзел у знакавых беларуска-расійскіх мерапрыемствах, з’яўляецца выканаўцам песні-гімна Саюзнай дзяржавы «Дзве сястры Беларусь і Расея», больш за дзесяць гадоў удзельнічае ў канцэртах, прысвечаных Дню яднання народаў дзвюх краін.

БЕЛТА