Касманаўт Алег Навіцкі сустрэўся са студэнтамі Магілёўскага інстытута МУС Рэспублікі Беларусь. Ён расказаў прысутным аб псіхалагічнай падрыхтоўцы да палёту, буднях на арбіце, пра тое, як забяспечваецца правільнае харчаванне і здароўе членаў экіпажа.

«Падбор адбываецца з улікам псіхалагічных асаблівасцяў кожнага чалавека і псіхалагічнай сумяшчальнасці, –адзначыў госць. – Падчас працяглай падрыхтоўкі да палёту – каля двух гадоў – выкарыстоўваюцца спецыяльныя методыкі, тэсты. У нас чатыры медкамісіі ў год, і кожная ўключае таксама гутарку з псіхолагам. На аснове гэтых псіхалагічных партрэтаў экіпаж падбіраецца такім чынам, каб падчас палёту быў максімум выніку і мінімум дыскамфорту».

З асаблівай цікавасцю курсанты слухалі пра традыцыі, якія абавязкова выконваюцца перад кожным палётам. Напрыклад, напярэдадні старту ўсе члены экіпажа глядзяць на ўдачу фільм «Белае сонца пустыні», а песня «Трава ля дома» гучыць на Байкануры, калі іх праводзяць на стартавую пляцоўку.

Разважаючы пра касманаўтыку будучага, Алег Навіцкі падкрэсліў: «Хацелася б, каб космас стаў больш даступным для звычайных людзей. Бо ні адна камера, фотаапарат не перадаюць яркасць і прыгажосць нашай планеты. На самай справе ўсё значна больш цікавае, зачаравальнае. Гледзячы на Зямлю з такой вышыні, разумееш бессэнсоўнасць войнаў, паколькі тут няма ніякіх межаў. У космасе не хапае толькі таго, да чаго прывык кожны з нас: зносін з блізкімі людзьмі, свежага паветра, павеву ветру, паху лесу. Ён таксама дадаў, што ў цяперашні час нават касманаўты чакаюць свайго першага палёту не адзін год. Так, госць адправіўся ў космас толькі праз пяць гадоў пасля пачатку падрыхтоўкі, а яго сябар – праз 12.

Алег Навіцкі лічыць, што сёння вельмі важна ўсебакова расказваць моладзі пра прафесію касманаўта, каб адрадзіць да яе цікавасць. «На мой погляд, на дадзены момант імкненне паляцець у космас астывае, – адзначыў госць. – Раней больш актыўна асвятлялася, у тым ліку ў прэсе, гэтая тэма: кожны ўзлёт, кожная пасадка былі святам не толькі для саміх касманаўтаў, але і для звычайных людзей». Ён заўважыў, што наведвае ў Магілёве інстытут МУС не выпадкова. Тут рыхтуюць і выхоўваюць спецыялістаў, у якіх не толькі павінна быць на высокім узроўні самадысцыпліна, яны яшчэ абавязаны быць прыкладам для іншых, валодаць якасцямі, якія дазволяць кантраляваць парадак у горадзе і забяспечваць абарону грамадзян. Падчас сустрэчы касманаўт адказаў на шматлікія пытанні курсантаў, наведаў гістарычны музей ВНУ і распісаўся ў Кнізе ганаровых гасцей. Студэнты ж, у памяць аб сустрэчы, уручылі яму нагрудны знак навучальнай установы і выказалі надзею, што ён возьме падарунак у чарговы палёт.

Алег Навіцкі адправіўся на МКС разам з экіпажам місіі 50/51 амерыканкай Пэгі Уітсан і французам Тама Пескі на караблі «Саюз МС-03» з касмадрома Байканур 17 лістапада 2016 года. На арбіце ён правёў 197 сутак і вярнуўся на Зямлю 2 чэрвеня 2017 года. Гэтая экспедыцыя – ужо другі яго палёт у космас. Першы раз ён знаходзіўся на арбіце з 23 кастрычніка 2012 па 16 сакавіка 2013 года як камандзір карабля «Саюз ТМА-06М». Алег Навіцкі з’яўляецца ўраджэнцам Червеня Мінскай вобласці.