У Магілёўскай вобласці у 2017 годзе на 30% зменшылася колькасць зарэгістраваных выпадкаў шаленства сярод жывёл. Пра гэта паведамілі спецыялісты абласнога цэнтра гігіены, эпідэміялогіі і грамадскага здароўя.

Так, па дадзеных ветэрынарнай службы за студзень-снежань 2017-га зафіксавана 38 падобных фактаў супраць 54 за аналагічны перыяд 2016 года.

Як і раней, часцей за ўсё на тэрыторыі рэгіёна трапляліся шалёныя лісы – 27 выпадкаў. Акрамя таго, рэгістраваліся выпадкі шаленства янотападобнага сабакі (5 фактаў), буйной рагатай жывёлы і бяздомных катоў (па 2 выпадкі), лася і хатняй сабакі (па 1).

У разрэзе рэгіёнаў найбольшая колькасць шалёных жывёл зарэгістравана ў Клімавіцкім і Круглянскім раёнах – 7 і 5 выпадкаў адпаведна. Найбольш спрыяльная эпізаатычная сітуацыя адзначалася ў Магілёве, Быхаўскім, Касцюковіцкім, Крычаўскім, Мсціслаўскім і Чэрыкаўскім раёнах, дзе было выяўлена па адным падобным выпадку.