Першую аперацыю па перасадцы ныркі правялі ў Магілёве, паведаміла прэс-сакратар Міністэрства аховы здароўя Юлія Барадун.

Аперацыя была праведзена 5 студзеня ў Магілёўскай абласной бальніцы. Па словах начальніка ўпраўлення аховы здароўя аблвыканкама Аляксандра Жыліна, хірургі рэгіёна актыўна рыхтаваліся да правядзення такой аперацыі. Аперацыйная брыгада прайшла сур’ёзную практыку – навучанне праводзілі спецыялісты РНПЦ трансплантацыі органаў і тканак пад кіраўніцтвам доктара медыцынскіх навук прафесара Алега Румо. Прайшлі спецыяльную падрыхтоўку і медыцынскія сёстры.

На працягу 2017 года паступова жыхары рэгіёна, якім былі перасаджаны органы, перайшлі на падтрымліваючую тэрапію і назіранне ў Магілёўскую абласную бальніцу. «Нашы ўрачы навучыліся працаваць з такімі пацыентамі, аказваць ім дапамогу, даваць кансультацыі. Прыйшоў час для новага рыўка – правядзення аперацыі», – заўважыў Аляксандр Жылін.

У аперацыі ўдзельнічала брыгада ўрачоў Магілёўскай вобласці пад кіраўніцтвам Леаніда Ткачова (РНПЦ трансплантацыі органаў і тканак), у якую ўвайшлі Сяргей Петрашэўскі, Яўген Котаў і Дзяніс Сіткевіч. Пацыент, якому правялі аперацыю, – чалавек з унікальным лёсам. Амаль 20 гадоў таму яму выдалілі адну нырку з-за развіцця ў ёй пухліны. А некалькі гадоў таму выявілі анкалагічнае захворванне і ў другой. Жыхар Шклова некалькі гадоў знаходзіўся на гемадыялізе, расказаў галоўны ўрач Магілёўскай абласной бальніцы Сяргей Галуза.

Магілёўская абласная бальніца – сучасная ўстанова аховы здароўя, тут распрацавана і ўкаранёна вялікая колькасць найноўшых медыцынскіх тэхналогій. Бальніца выконвае важную арганізацыйна-метадычную і каардынуючую ролю ў павышэнні якасці аказання медыцынскай дапамогі насельніцтву, перадаючы назапашаны вопыт іншым установам аховы здароўя вобласці.

БЕЛТА