Кніжная выстава «Магілёўскай вобласці – 80 год» працуе ў агульнай чытальнай зале Магілёўскай абласной бібліятэкі імя У. І. Леніна. Пра гэта паведамілі ва ўстанове культуры.

Па словах суразмоўцаў, у экспазіцыі сабраны кнігі, фотаальбомы, энцыклапедычныя і даведачныя выданні, якія расказваюць пра гісторыю вобласці, пра слаўныя і гераічныя падзеяі, станаўленне і развіццё прамысловасці, сельскай гаспадаркі, ахову здароўя, адукацыю. Прадстаўлены фаліянты, дзе можна пазнаёміцца са знакамітымі людзьмі Магілёўшчыны, помнікамі гісторыі, архітэктуры, садова-паркавага мастацтва, музейнымі калекцыямі.

Кніжная выстава будзе рэгулярна абнаўляцца і дзейнічаць да канца 2018 года.

Даведачна:

У 1938 годзе ў Беларусі праведзена адміністрацыйная рэформа, у выніку якой было створана 5 абласцей. Сярод іх – Магілёўская з адміністрацыйным цэнтрам горадам Магілёвам. Сёння ў склад рэгіёна ўваходзіць 21 раён, 15 гарадоў, у тым ліку два абласнога падпарадкавання – Магілёў і Бабруйск, 8 пасёлкаў гарадскога тыпу, 155 сельсаветаў з 2985 сельскімі населенымі пунктамі. Насельніцтва Прыдняпроўскага краю налічвае больш за 1 млн. чалавек.