У лютым Магілёўскі абласны драматычны тэатр пакажа гледачу новую эксперыментальную пастаноўку Саўлюса Варнаса «Ліпень» па п’есе Івана Вырыпаева. Пра гэта паведамілі ў адміністрацыі тэатра.

Прэм’ера запланавана да паказу 21 і 22 лютага. У анатацыі значыцца ўзроставае абмежаванне 18+. Спектакль пройдзе на малой сцэне ў жывым музычным суправаджэнні. Паэтычныя і страшныя адкрыцці звар’яцелага старога-канібала будзе чытаць актрыса Юлія Ладзік.

«Ліпень» культавага сучаснага рэжысёра і драматурга Івана Вырыпаева часта называюць самым моцным тэатральным тэкстам з напісаных на рускай мове ў апошнія гады, адзначылі суразмоўцы. Нягледзячы на першае злавеснае і негатыўнае ўражанне, тэкст валодае містычнай прыгажосцю і асаблівай музычнасцю, адначасова палохае і зачароўвае, шакіруе і прымушае задумацца.

«П’еса Івана Вырыпаева выклікала вялікі рэзананс – яе лаялі і хвалілі. І кожны ў сваёй ацэнцы, магчыма, меў рацыю, паколькі зыходзіў з уласнага ўяўлення аб справядлівасці і дазволенасці, злачынстве і пакаранні, марах і рэальнасці, – падкрэсліў Саўлюс Варнас. – Мары чалавека, памкненні яго душы для мяне заўсёды больш цікавыя, чым рэальныя ўчынкі... Тэкст твора для мяне вельмі хрысціянскі. Галоўны герой п’есы, як нам здаецца, скончаны і безнадзейны маньяк, – застаецца жыць на зямлі пасля ўсіх сваіх злачынстваў. Яму даецца яшчэ адна магчымасць, яшчэ адзін шанец адрадзіцца. Зрабіць гэта ён можа толькі на зямлі і толькі да таго часу, пакуль не перапыняе веру ў само існаванне Бога, пакуль не адракаецца ад яго. Толькі пасля гэтага прыходзіць яго смерць – праз чалавечы суд».