Першая ў Магілёўскай вобласці кнігарня сеткі «Белкніга» адкрылася сёння ў Бабруйску. Павіншаваць жыхароў горада на Бярэзіне з гэтай падзеяй прыехалі Міністр інфармацыі Беларусі Аляксандр Карлюкевіч, генеральны дырэктар ААТ «Белкніга» Аляксандр Вашкевіч, старшыня Беларускага прафесійнага саюза работнікаў культуры, інфармацыі, спорту і турызму Таццяна Філімонава, кіраўніцтва Бабруйскага гарадскога выканаўчага камітэта.

З’яўленне сучаснай кнігарні стала значнай падзеяй у культурным жыцці горада, месцам знаёмства з навінкамі кнігавыдання, сустрэч з аўтарамі.

Міністр інфармацыі выказаў шчырую ўдзячнасць мясцовым уладам і кіраўніцтву ААТ «Белкніга» за магчымасць рэалізацыі такіх праектаў. Аляксандр Карлюкевіч падкрэсліў, што гэта не апошні новы пункт продажу кніг менавіта ў Бабруйску.

Наведвальнікам крамы будзе прадстаўлены не толькі шырокі асартымент кніжных выданняў – мастацкая, вучэбная, дзіцячая і краязнаўчая літаратура, энцыклапедычныя і навуковыя выданні, але і канцылярскія прыналежнасці і многае іншае.

Па матэрыялах Міністэрства інфармацыі Беларусі

Фота - Міністэрства інфармацыі Беларусі і газета «Бабруйскае жыццё»