Прэм’еру «Былыя» пакажа ў сакавіку Магілёўскі абласны драматычны тэатр. Спектакль пройдзе на малой сцэне 9, 10, 11 і 14 сакавіка, паведамілі карэспандэнту сайта ў адміністрацыі ўстановы культуры.

Па словах суразмоўцаў, гледачоў чакае амаль французская камедыя па п’есе расійскага драматурга Вольгі Сцяпновай. Рэжысёрамі пастаноўкі выступілі артысты нашага драмтэатра – Ганна і Руслан Кушнеры. Гэта не першая іх сумесная праца. Раней тандэм прадставіў магілёўскаму гледачу камедыю «Псіхааналіз – гэта мастацтва».

«Спектакль «Былыя» – лёгкі, бліскучы, рамантычны і моладзевы. Гісторыю разыграюць Вольга Ліфпуц, Часлаў Вількін, Аляксандр Куляшоў, Марыя Рудакова, Руслан і Ганна Кушнеры», – падкрэслілі суразмоўцы.

У анатацыі да пастаноўкі гаворыцца: «Былая жонка – гэта як стаптаныя чаравікі: выйшлі з моды, а выкінуць шкада. А былы муж – ён, як учарашняя вячэра, цікавасці ўжо дакладна не выклікае ... Але ці так усё на самай справе? А калі былыя муж і жонка жывуць пад адным дахам у сілу абставінаў? Ды яшчэ і не адны, а са сваімі новымі спадарожнікамі? З аднаго боку, усё, што адбываецца, амаль камедыя ... А можа быць, драма? Ці ўвогуле сямейны трылер?».