Абласное зімовае спартыўнае свята «Беларуская лыжня – 2018» пройдзе 24 лютага ў Пячэрскім лесапарку. Чакаецца, што спаборніцтва збярэ каля 500 чалавек з усіх раёнаў вобласці, а таксама Магілёва і Бабруйска, паведамілі карэспандэнту сайта ва ўпраўленні спорту і турызму Магілёўскага аблвыканкама.

Урачыстае адкрыццё спартыўнага свята адбудзецца ў 10.30. Пачнуцца спаборніцтвы ў 11.00 гонкамі на 2 км і 1 км у мужчын і жанчын, старэйшых за 50 гадоў. На старт выйдуць старшыні камітэтаў, начальнікі ўпраўленняў аблвыканкама і іх намеснікі, старшыні раённых Саветаў дэпутатаў, выканкамаў, кіраўнікі адміністрацый і іх намеснікі. За імі выступяць мужчыны і жанчыны да 50 гадоў, 60-70, 70 гадоў і старэйшыя, 55-60, 50-54, 40-49, 30-39. Завершаць спартыўнае свята выступленні маладых людзей ва ўзросце 18-29 гадоў.

Для аматараў лыжных гонак падрыхтаваныя розныя дыстанцыі. Так, мужчынам 18-49 гадоў трэба будзе прабегчы 3 км, жанчынам у дадзеным узроставым дыяпазоне – 2 км. Даўжыня трасы для прадстаўнікоў моцнага полу 50-60 гадоў складзе 2 км, для жанчын у дадзенай групе – 1 км. Такую ж адлегласць арганізатары адмералі для ўсіх удзельнікаў 60 гадоў і старэйшых, прычым апошнія будуць выступаць па-за конкурсам пры наяўнасці медыцынскай даведкі.

Пераможцаў і прызёраў вызначаць як у асабістым, так і камандным заліках. Спартсменам, якія фінішуюць першымі ў сваіх катэгорыях, уручаць медалі, дыпломы і падарункі. Для лыжнікаў з другім і трэцім вынікамі падрыхтаваны медалі і дыпломы адпаведных ступеняў. Каманду-пераможцу, сярэбранага і бронзавага прызёраў узнагародзяць кубкамі і дыпломамі.

Акрамя спартыўнай часткі, арганізатары свята падрыхтавалі культурна-забаўляльную праграму з удзелам творчых калектываў горада. Гасцей і ўдзельнікаў мерапрыемства пачастуюць салдацкай кашай з гарбатай. На пляцоўцы будуць працаваць аб’екты рознічнага гандлю, ажыццяўляцца пракат лыж.

Арганізатарам абласнога зімовага спартыўнага свята «Беларуская лыжня – 2018» выступае ўпраўленне спорту і турызму Магілёўскага аблвыканкама.