Сёння адбылася першая сесія Магілёўскага абласнога Савета дэпутатаў 28-га склікання. Дэпутат ад Юбілейнай выбарчай акругі №36 Дзмітрый Харытончык большасцю галасоў быў абраны старшынёй абласнога Савета дэпутатаў. Да гэтага ён працаваў на пасадзе намесніка старшыні Магілёўскага аблвыканкама.

Адкрываючы пасяджэнне, кіраўнік рэгіёна Уладзімір Даманеўскі падзякаваў абласной выбарчай камісіі на чале з Валерыем Бераставым за правядзенне на высокім прафесійным і арганізацыйным узроўні выбараў у мясцовыя Саветы дэпутатаў 28-га склікання.

Звяртаючыся да зноў абранага дэпутацкага корпуса, кіраўнік рэгіёна заўважыў, што гэта своеасаблівы рэзерв кадраў, паколькі цяперашні Савет у большасці сваёй складаецца з тых, хто праявіў сябе ў працоўнай дзейнасці, умее весці гутарку з людзьмі, дыскутаваць з рознай аўдыторыяй, пераконваць, слухаць і кіраваць.

Сфарміраваны склад аблсавета, па словах Уладзіміра Даманеўскага, атрымаўся годным, добрым і па прафесійнай прыналежнасці ахапіў усе найважнейшыя сферы, якія забяспечваюць жыццядзейнасць Магілёўскай вобласці.

Губернатар пажадаў дэпутатам паспяховай працы на карысць Прыдняпроўскага краю, і падкрэсліў, што пры падборы кандыдатуры старшыні аблсавета ў першую чаргу разглядаліся дзелавыя і маральныя якасці прэтэндэнтаў, якія дазваляюць стаць ля руля ўсяго дэпутацкага корпуса Магілёўшчыны. За дастаткова кароткі час на пасадзе намесніка старшыні Дзмітрый Харытончык зарэкамендаваў сябе граматным і кваліфікаваным чалавекам, які ўмее адстойваць кадры і бачыць прафесійны патэнцыял спецыялістаў.

Уладзімір Даманеўскі выказаў надзею на актывізацыю работы мясцовых Саветаў і заўважыў, што рашэнне многіх пытанняў, праблем, якія сёння ўздымаюць людзі, ляжыць у плоскасці адказнасці саміх грамадзян. А значыць, задача дэпутатаў – быць максімальна блізка да насельніцтва, ініцыяваць грамадска карысныя справы і прыцягваць да ўдзелу ў іх жыхароў Прыдняпроўскага краю.

У сваю чаргу, Дзмітрый Харытончык нагадаў зноў абраным дэпутатам, што зусім нядаўна, будучы кандыдатамі, на стадыі сустрэч з калектывамі прадпрыемстваў, арганізацый, грамадзянамі па месцы жыхарства, яны бралі на сябе пэўныя абавязацельствы. У кожнага абяцанні былі свае, але зводзіліся да адной мэты – зрабіць жыццё ў рэгіёне лепшым і больш камфортным. «Цяпер галоўнае, каб гэтыя абяцанні не засталіся пустымі словамі, – падкрэсліў ён. – Неабходна прыступіць да метадычнай рэалізацыі ўзятых абавязацельстваў, паспрабаваць дайсці да кожнага выбаршчыка, кожнай праблемы, якія хвалююць жыхароў Магілёўскай вобласці, а праз зацвярджэнне і кантроль выканання прагнозаў сацыяльна-эканамічнага развіцця прыняць непасрэдны ўдзел у развіцці прамысловай і сельскагаспадарчай вытворчасці, сферы паслуг, малога і сярэдняга бізнесу, асабістых падсобных гаспадарак адпаведных тэрыторый».

На думку Дзмітрыя Харытончыка, дэпутацкі корпус таксама павінен актыўна займацца распрацоўкай і рэалізацыяй мерапрыемстваў па захаванні і адраджэнні гісторыка-культурных каштоўнасцей, папулярызацыі знакавых месцаў рэгіёна, фарміруючы такім чынам брэнд Магілёўскай вобласці. Пры гэтым асаблівую ўвагу неабходна надаць навядзенню парадку на зямлі, добраўпарадкаванню тэрыторый. І тут вельмі важна, каб кожны дэпутат, з’яўляючыся генератарам новых ідэй, актыўна прыцягваў выбаршчыкаў да рэальнага ўдзелу ва ўсіх мерапрыемствах. «Неабходна, каб мясцовыя Саветы станавіліся цэнтрам канцэнтрацыі грамадскай думкі па тых ці іншых пытаннях мясцовага жыцця, формай не толькі грамадскага ўздзеяння на органы кіравання, але і непасрэднага ўдзелу ў стварэнні камфортных умоў для жыцця», – лічыць ён.

Дзмітрый Харытончык выказаў упэўненасць, што эфектыўная праца любога дэпутата немагчымая без глыбокага ведання свайго рэгіёна, яго характэрных асаблівасцей і наяўных праблемных пытанняў. Таму ў кожнага дэпутата ў якасці асноўнага працоўнага інструмента павінен быць свайго роду пашпарт акругі, дзе былі б адлюстраваны ўсе найважнейшыя аспекты, пачынаючы ад колькасці людзей, якія пражываюць на дадзенай тэрыторыі (пенсіянераў, ветэранаў, інвалідаў, усіх, хто аказаўся ў складанай жыццёвай сітуацыі), да асаблівасцей, якія характарызуюць самабытнасць і ўнікальнасць традыцый і знакавых месцаў тэрыторыі. Фарміраванне такога дакумента дасць магчымасць не толькі больш дэталёва вывучыць свой рэгіён, але і пабудаваць прадметную працу.

«Дэпутат любога ўзроўню з’яўляецца свайго роду сувязным звяном паміж выбаршчыкамі і выканаўчай уладай, – падкрэсліў Дзмітрый Харытончык. – І ад таго, наколькі трывалая гэтая сувязь, залежыць вынік і дабрабыт кожнага». Таму галоўнай задачай на новай пасадзе ён бачыць наладжванне сістэмнай работы Саветаў усіх узроўняў – ад першаснага да абласнога – па рашэнні надзённых пытанняў на месцах, садзеянні ў наладжванні канструктыўнага дыялога насельніцтва з органамі ўпраўлення гарадоў і раёнаў, вобласці ў цэлым.

Падчас пасяджэння дэпутаты таксама абралі намесніка старшыні аблсавета. Гэтую пасаду заняла дэпутат ад Тэкстыльнага выбарчай акругі №33 Святлана Шутава, якая ўжо доўгі час працуе галоўным рэдактарам інфармацыйнага агенцтва «Магілёўскія ведамасці».

Акрамя таго, было ўтворана пяць пастаянных камісій абласнога Савета дэпутатаў: па эканоміцы, бюджэце і фінансах; па аграрных пытаннях, праблемах Чарнобыльскай катастрофы, экалогіі і прыродакарыстанні; па пытаннях мясцовага кіравання, самакіравання, законнасці і мандатах; па пытаннях сацыяльнай сферы, сацыяльнай абароны грамадзян і справах моладзі; па прамысловасці, будаўніцтве, транспарце, сувязі, жыллёва-камунальнай і дарожнай гаспадарцы.