У 2017 годзе ў Магілёўскай вобласці ўстаноўлена 13 новых памятных знакаў загінулым салдатам і ахвярам войнаў. Аб гэтым паведаміла начальнік галоўнага ўпраўлення ідэалагічнай работы, культуры і па справах моладзі аблвыканкама Кацярына Музычэнка, выступаючы сёння на выніковай калегіі.

Паводле яе слоў, захаванне памяці пра загінулых пры абароне Айчыны па-ранейшаму з’яўляецца адным з прыярытэтных напрамкаў у ідэалагічнай працы. У мінулым годзе адрэстаўраваны 972 пахаванні і памятныя знакі, капітальна адрамантавана 16. На гэтыя работы, уключаючы ўстаноўку новых, затрачана звыш Br250 тыс.

Вялікую ролю ў правядзенні пошукавай работы на Магілёўшчыне адыгрывае гісторыка-патрыятычны пошукавы клуб «ВІККРУ», у склад якога ўваходзіць 17 пошукавых падраздзяленняў колькасцю каля 100 чалавек. «Гэта людзі, якія вядуць дзейнасць у асноўным за кошт уласных сродкаў», – падкрэсліла Кацярына Музычэнка.

Карыстаючыся прысутнасцю начальніка ўпраўлення па ўвекавечанні памяці абаронцаў Айчыны Міністэрства абароны Беларусі Сяргея Варановіча, галоўны ідэолаг рэгіёна падзякавала яму за разуменне і аператыўнае рашэнне пытанняў, звязаных з пазапланавымі работамі 52-га пошукавага батальёна ў нашай вобласці.