Вядомы беларускі гіравік Вячаслаў Харанека, ураджэнец Бабруйска, устанавіў 155-ы рэкорд за сваю кар’еру.

Ён устанавіў чарговае дасягненне ў Асіповічах, дзе праходзіць міжнародны турнір па гіравым спорце, на які сабралася больш за сто атлетаў з Беларусі, Расіі і Літвы. Упершыню ў ходзе гэтых спаборніцтваў праводзіўся Кубак Вячаслава Харанекі у жыме 32-кілаграмовай гіры лежачы на працягу 30 хвілін. У гэтым турніры ў вагавой катэгорыі да 78 кг першае месца заняў Уладзімір Дзям’янаў (універсітэт МНС) – 748 уздымаў. У катэгорыі больш за 85 кг найлепшым стаў Антон Шнітко – 537 уздымаў.

Вячаслаў Харанека, які прадстаўляў каманду «Эпам Сістэмз», стаў найлепшым у катэгорыі да 85 кг. За 30 хвілін яму ўдалося падняць гіру 880 раз. Гэта новае нацыянальнае дасягненне і 155-ы рэкорд атлета за кар’еру. Спаборніцтвы ў Асіповічах праходзяць у фізкультурна-аздараўленчым комплексе «Юнацтва». Таксама ў ходзе спаборніцтваў будуць разыграны медалі адкрытага чэмпіянату Беларусі і першынство краіны па гіравым марафоне.

БЕЛТА