Тэматычныя майстар-класы і канцэрты адбудуцца да Дня Перамогі ва ўстановах агульнай сярэдняй адукацыі Магілёва. Аб гэтым карэспандэнту сайта паведамілі ў гарвыканкаме.

Па словах суразмоўцаў, мерапрыемствы, прымеркаваныя да 9 Мая, пройдуць паўсюдна. «Моладзь актыўна рыхтуецца да вялікага свята, стараецца праявіць сябе па ўсіх напрамках, – адзначылі спецыялісты. – Так, хлопцы і дзяўчаты прымаюць удзел у акцыях «Ветэран жыве побач», «Кветкі ветэранам», якія закліканы дапамагаць абаронцам Айчыны і адзінокім пажылым людзям, і «Магіла воіна – святая для Айчыны» па навядзенні парадку на месцах пахаванняў».

Ярка і маляўніча плануюць сустракаць ветэранаў падчас тэатралізаванага шэсця ў Дзень Перамогі. Для гэтага навучэнцы рыхтуюць кампазіцыі з яблыневым цветам. Па задумцы, моладзь пастроіцца ў жывы калідор з галінкамі і паветранымі шарамі белага, ружовага і зялёнага колеру, сімвалізуючы вясновы сад. «Гэтым мы хочам нагадаць усім магіляўчанам, што менавіта вясной прыйшла Перамога», – падкрэслілі суразмоўцы.

Сёння пройдзе рэпетыцыя яшчэ адной цікавай акцыі. «Тры гады таму ініцыятыва Маладзёжнага парламента пры Магілёўскім гарадскім Савеце дэпутатаў перарасла ў знакавы праект – «Стужка Памяці», – адзначылі спецыялісты. – Школьнікам прапанавалі даведацца ў сваіх

родных аб лёсах прадзедаў і прабабуль, якія, магчыма, былі ўдзельнікамі падзей 1941-1945 гадоў. Калі сваякі ваявалі, то іх імёны ўпісваюцца ў Стужку Памяці. Такім чынам, даўжыня палатна дасягнула ўжо больш за 300 метраў».

Не абыдзецца і без урокаў мужнасці, святочных канцэртаў. Так, 28 красавіка ў гімназіі №3 абласнога цэнтра з 10.30 да 14.30 пройдзе Дзень патрыятычнага выхавання. Праграмай запланавана прэзентацыя віртуальнага музея, канцэрт, майстар-класы па інавацыях, прэзентацыя фотавыставы і інш. 4 мая ў гімназіі №4 і СШ №18 запланаваны майстар-класы па вырабе галінак яблыневага цвету і ўрачыстага прывітання ветэранаў. 8 мая да эстафеты падключацца гімназія №2 і СШ №41. Яны падрыхтавалі святочны канцэрт і музычна-літаратурную кампазіцыю «Быў дзень як дзень».