Прэс-служба ФК «Днепр» апублікавала афіцыйны зварот генеральнага дырэктара ЗАТ «Футбольны клуб Днепр» Дзмітрыя Калачова да балельшчыкаў каманды.

Падставай паслужылі сур’ёзныя штрафныя санкцыі ў дачыненні да клуба за непрыстойныя паводзіны балельшчыкаў падчас футбольных матчаў.

– Паважаныя актыўныя балельшчыкі нашай каманды! Кіраўніцтва ЗАТ «Футбольны клуб Днепр» лічыць неабходным звярнуцца да вас з просьбай, спачатку паведаміўшы рашэнні праваахоўных органаў, а таксама органаў Асацыяцыі «Беларуская федэрацыя футбола», якая займаецца правядзеннем «Беларусбанк-чэмпіянату Рэспублікі Беларусь па футболе сезона 2018 года сярод каманд вышэйшай лігі» і розыгрышу Кубка Рэспублікі Беларусь па футболе 2018/2019 года.

Ужо пасля стартавага матчу каманды ў сезоне 2018 года (11.03.2018, Салігорск, ФК «Шахцёр» – ФК «Днепр») на адрас клуба прыйшло пісьмо за подпісам сакратара Камітэта кантрольна-дысцыплінарнага і па этычных пытаннях АБФФ Р. Х. Юмагужына, у якім звяртаецца ўвага на непрыстойныя паводзіны актыўных балельшчыкаў «Дняпра», у прыватнасці, выкрыкванне правакацыйных крычалак, лозунгаў расісцкага і дыскрымінацыйнага зместу. Разгледзеўшы ліст УУС Мінскага аблвыканкама, члены Камітэта аднагалосна прагаласавалі за прымяненне дысцыплінарнай санкцыі ў выглядзе штрафу ў дачыненні да ФК «Днепр» у памеры двухсот базавых велічынь – 4900 беларускіх рублёў.

Май прынёс адразу два інцыдэнты са знакам «мінус», якія таксама не засталіся без увагі галоўнага футбольнага ведамства краіны. Так, па рашэнні Камітэта за парушэнне ў матчы 1/2 фіналу розыгрышу Кубка Беларусі 2017/2018 года (02.05.2018, Магілёў) паміж ФК «Днепр» і ФК «Дынама-Брэст» ужыць у дачыненні да нашага клуба дысцыплінарную санкцыю ў выглядзе штрафу ў памеры дзесяці базавых велічынь – 245 беларускіх рублёў. Сутнасць парушэння – запальванне неўстаноўленага рэчыва (са слоў работнікаў праваахоўных органаў), у выніку чаго адбыўся выкід чорнага дыму.

Таксама падчас матчу 6-га тура «Беларусбанк-чэмпіянату Рэспублікі Беларусь па футболе сезона 2018 года сярод каманд вышэйшай лігі» паміж ФК «Днепр» і ФК БАТЭ паводле рапарта інспектара ў сярэдзіне другога тайма балельшчыкі нашай каманды арганізавалі крычалкі ў выглядзе нецэнзурнай лаянкі на адрас каманды саперніка. За гэта парушэнне Дысцыплінарны камітэт АБФФ ужыў у дачыненні да нашага клуба санкцыю ў выглядзе штрафу ў памеры пяцідзесяці базавых велічынь – 1225 беларускіх рублёў.

«Днепр» – клуб з саліднай гісторыяй, добрымі традыцыямі і вялікай арміяй балельшчыкаў. Кіраўніцтва клуба просіць зразумець сітуацыю, якая склалася пасля названых інцыдэнтаў. Не стамляемся паўтараць: ваша падтрымка ніколі не застанецца не заўважанай усімі, хто працуе на карысць магілёўскага футбола. У той жа час празмерная актыўнасць балельшчыкаў падчас матчаў, якая супярэчыць рэгламентным дакументам АБФФ, не спрыяе паслядоўнаму вырашэнню задач каманды і развіццю клуба.

Акрамя таго, на інцыдэнт падчас матчу супраць каманды «Дынама-Брэст» адрэагавала УУС Магілёўскага аблвыканкама. На адрас клуба прыйшло прадстаўленне аб ліквідацыі прычын і ўмоў, якія спрыяюць здзяйсненню правапарушэнняў, у якім зроблена выснова аб тым, што паміж клубам і актыўнымі балельшчыкамі «адсутнічае належнае ўзаемадзеянне». Нікому не трэба, каб кампетэнтнасць і выкананне працоўных абавязкаў спецыяліста па працы з балельшчыкамі, таго, хто працуе ў ЗАТ не першы год, ацэньвалася праваахоўнымі органамі менавіта так і толькі па адзінкавым эпізодзе.

Давайце не забудзем і пра маральныя складнікі. Нецэнзурную лаянку, якая часта раздаецца ў адказ на правакацыйныя лозунгі прадстаўнікоў фанацкага сектара каманды сапернікаў, чуваць не толькі яе адрасатам, але і дзецям, якія прыйшлі на стадыён зусім па іншыя ўражанні.

Сродкі, якія клуб абавязаны выплаціць, маглі быць выдаткаваныя, напрыклад, на арганізаваны выезд балельшчыкаў для падтрымкі каманды ў гасцявым матчы. Пагадзіцеся, карысць з такіх мерапрыемстваў маюць усе зацікаўленыя бакі.

Спадзяёмся, што наш пасыл знойдзе водгук у вашых радах, і клуб у сезоне – 2018 больш не стане аб’ектам пільнай увагі з боку Камітэта кантрольна-дысцыплінарнага і па этычных пытаннях АБФФ.