У 43-м з’ездзе грамадскага аб’яднання «Беларускі рэспубліканскі саюз моладзі», які пройдзе сёння ў Мінску, прыме ўдзел 120 дэлегатаў ад Магілёўскай вобласці. Наша моладзь на чале з першым сакратаром абласнога камітэта ГА «БРСМ» Паўлам Алексам раніцай адправілася ў сталіцу.

У мерапрыемствах з’езда будзе задзейнічана саюзная моладзь з усіх рэгіёнаў Прыдняпроўскага краю. Гэта найбольш актыўныя хлопцы і дзяўчаты, якія праявілі сябе ў розных напрамках – спорце, грамадскім жыцці ВНУ, уборцы ўраджаю, на рабочым месцы. Яны наведаюць тэматычную выставачную экспазіцыю ў канцэртнай зале «Мінск». На плошчы Перамогі прымуць удзел ва ўрачыстым ускладанні ў межах патрыятычнай акцыі «Мы помнім і ганарымся!». Падчас пленарнага пасяджэння курсант факультэта міліцыі Магілёўскага інстытута МУС Максім Патаранка выступіць з дакладам аб моладзевых атрадах аховы правапарадку. Далей маладых людзей чакае цырымонія ўзнагароджання найлепшых пярвічных арганізацый ГА «БРСМ», уручэнне прэміі лаўрэата Саюза моладзі, пленумы ЦК ГА «БРСМ» і ЦКК ГА «БРСМ», прэзентацыя новай моладзевай песні «Маладая Беларусь».

У маштабным форуме, які арганізуецца адзін раз на тры гады, прымаюць удзел дэлегаты з усёй рэспублікі. Мерапрыемства праходзіць пад дэвізам «БРСМ: час наперад!».