Гран-пры XVII Міжнароднага фестывалю дзіцячай творчасці «Залатая пчолка» атрымалі прадстаўнікі Беларусі і Расіі. Форум праходзіў з 31 мая па 3 чэрвеня ў Клімавічах.

Найвышэйшая ўзнагарода конкурснай праграмы форуму дасталася вакальнаму трыа «DiVoice» і салістцы прадзюсарскага цэнтра «Мьюзік М» Садоўскай Ліліяне (Магілёў), а таксама заслужанаму калектыву народнай творчасці ансамблю сучаснага танца «Ракета» муніцыпальнай бюджэтнай УА «Дзіцячая школа мастацтваў «Созвездзие» (Ніжні Ноўгарад, Расія).

Дыпломы першай ступені ўручылі адразу 14 удзельнікам. У іх ліку салістка эстраднай майстэрні Васіля Сянькова Валерыя Лях (Мінск); навучэнка Магілёўскай гарадской гімназіі №1 Арына Пехцерава; салістка ўзорнай вакальнай студыі «Мікс» ДУА «Гімназія №61 г. Мінска» Акуліна Андрэева; навучэнка Магілёўскай дзіцячай школы мастацтваў №3 імя М. М. Салдатава Эльвіра Лібузер; вучаніца Магілёўскай дзіцячай школы мастацтваў №4 Ангеліна Гваджая; салістка прадзюсарскага цэнтра «Мьюзік М» Алена Цітова; узорны вакальны калектыў «Песенька» ДУА «Палац дзяцей і моладзі «Золак» г. Мінска»; вакальная група заслужанага калектыву Беларусі «Тэатр эстраднай песні «Сябрынка»» Палаца культуры Мінскага аўтамабільнага завода; народны вакальны ансамбль «Шарэні гайтані» (Варна, Балгарыя); вакальная група «Рабіначка» ДУА «Магілёўская дзіцячая школа мастацтваў №3 імя М. М. Салдатава»; навучэнка ДУА «Дзіцячая школа мастацтваў №1 імя Я. К. Цікоцкага г. Бабруйска» Лізавета Хорава; студыя сучаснай харэаграфіі «Натхненне» УА «Нацыянальны цэнтр мастацкай творчасці дзяцей і моладзі» Міністэрства адукацыі Беларусі; танцавальная група «Тынэйджары» заслужанага аматарскага калектыву Беларусі ўзорнага тэатра-студыі «Радуга» ДУДА «Абласны цэнтр творчасці» (Магілёў); дзіцячы фальклорны танцавальны ансамбль «Радасць» Цэнтра падтрымкі асобаснага развіцця (Бургас, Балгарыя).

Удзельнікамі «Залатой пчолкі» ў гэтым годзе стала больш за 600 юных талентаў з Беларусі, Расіі, Балгарыі, Малдовы і Украіны. Падчас фестывалю раённы цэнтр напоўнілі выступленні канкурсантаў і гасцей, выставы дэкаратыўна-прыкладнога і выяўленчага мастацтва, кірмашы, гала-канцэрты, майстар-класы. У фармаце музычнага форуму прайшлі «Дзень беларускай гасціннасці», «Дзень шчаслівага дзяцінства», «Дзень садружнасці нацыянальных традыцый», «Дзень сугучча талентаў», бліц-конкурс «Міс фестывалю «Залатая пчолка»», пасяджэнне Клуба ганаровых землякоў, свята «Арт-масты» і іншыя мерапрыемствы.

Фестываль дзіцячай творчасці «Залатая пчолка» праходзіць у Клімавіцкім раёне з 1996 года. У 2001-м конкурс атрымаў статус міжнароднага. Лаўрэатамі форуму ў розныя гады былі Ксенія Сітнік, Андрэй Кунец, Ганна Мушак, Лідзія Заблоцкая і інш. Раней фэст цешыў гасцей і жыхароў рэгіёна адзін раз на два гады. Пачынаючы з 2017-га прынята рашэнне праводзіць «Залатую пчолку» штогод.

Арганізатарамі музычнага форуму выступаюць Клімавіцкі раённы выканаўчы камітэт, Магілёўскі абласны выканаўчы камітэт, Міністэрства культуры Беларусі.