Другі этап адкрытага чэмпіянату Беларусі па аўтамадэльным спорце, радыекіраванні мадэлямі класаў «Дарожныя», адбудзецца ў Бабруйску 23 чэрвеня. Спаборніцтвы пройдуць на спецыяльнай трасе, размешчанай у гарадскім парку культуры і адпачынку, паведаміла карэспандэнту сайта загадчык тэхаддзела бабруйскага Цэнтра творчасці дзяцей і моладзі Таццяна Кізатава.

У спаборніцтвах плануе прыняць удзел каля 25 спартсменаў з усіх куткоў Сінявокай. Паводле папярэдняй інфармацыі, прыбудуць таксама госці з Расіі і Украіны. Згодна з палажэннем аб спаборніцтвах, узроставых абмежаванняў ва ўдзельнікаў няма, таму малодшыя будуць спаборнічаць нароўні з дарослымі.

Бабруйск будзе прадстаўляць спартсмен тэхаддзела Цэнтра творчасці, бронзавы прызёр XVI рэспубліканскай спартакіяды навучэнцаў па тэхнічных відах спорту Раман Бічан.

Пачатак мерапрыемства ў 11.00. Уваход вольны.