Больш за 30 дыпламатаў, акрэдытаваных у Беларусі, мае намер наведаць свята «Купалле» ў Александрыі («Александрыя збірае сяброў»), якое пройдзе 7-8 ліпеня на беразе Дняпра ў аграгарадку Александрыя Шклоўскага раёна. Пра гэта паведаміў сёння падчас выязнога пасяджэння рэспубліканскага аргкамітэта старшыня Беларускай гандлёва-прамысловай палаты Уладзімір Улаховіч.

Упершыню свята наведае такая колькасць прадстаўнікоў дыпламатычнага корпуса: свой удзел ужо пацвердзілі 34 госці, сярод іх паслы Расіі, Украіны, Вялікабрытаніі, Германіі, Казахстана, КНР, ААЭ, Грузіі.

«Пры складанні праграмы знаходжання ўлічаны ўсе пажаданні дыпламатаў. Так, 7 ліпеня ў першай палове дня яны наведаюць аднаго з вядучых экспарцёраў краіны – БелАЗ, а пасля адправяцца ў Александрыю, дзе азнаёмяцца з мясцовымі славутасцямі і наведаюць клас, у якім вучыўся Прэзідэнт Беларусі Аляксандр Лукашэнка. Затым праграмай прадугледжана сустрэча дыпламатаў з прадстаўнікамі ўрада краіны і брыфінг для СМІ», –заўважыў Уладзімір Улаховіч.

Для дыпламатаў падрыхтавана экскурсія па тэрыторыі свята «Купалле» з наведваннем яго тэматычных пляцовак. Дыпламаты змогуць адпачыць і пагутарыць у спецыяльна для іх падрыхтаваным стылізаваным штабе. А фінальным акордам іх знаходжання ў Магілёўскай вобласці стане ўдзел у якасці гледачоў у тэатралізаваным прадстаўленні «Малая радзіма» на галоўнай сцэнічнай пляцоўцы свята.

Першае свята «Купалле» адбылося ў 2010 годзе. Ідэю праводзіць фестываль у Александрыі тады падтрымаў кіраўнік дзяржавы. Гулянні традыцыйна пройдуць у маляўнічым месцы на беразе Дняпра, каля моста, які злучае не толькі два населеныя пункты – Александрыю і Копысь, але і дзве вобласці – Магілёўскую і Віцебскую.

БЕЛТА