У Беларусі яшчэ ёсць рэзервы для зніжэння стаўкі рэфінансавання. Пра гэта сёння на пленарным пасяджэнні Х Міжнароднага інвестыцыйнага форуму «Млын поспеху» ў Магілёве заявіў міністр эканомікі Беларусі Уладзімір Зіноўскі.

Беларусь рэалізуе стратэгію жорсткай макраэканамічнай палітыкі, глыбокую дыверсіфікацыю ўсіх гандлёвых і інвестыцыйных адносін, новых падыходаў да дзяржаўнага кіравання, фарміравання канкурэнтных умоў для прытоку інвестыцый і развіцця прыватнага бізнесу, заўважыў міністр эканомікі.

Меры па зніжэнні інфляцыі, фарміраванні бездэфіцытнага бюджэту і плацежнага балансу, стымуляванні ўнутранага попыту за апошнія два гады забяспечылі ліквідацыю дысбалансу беларускай эканомікі і яе выхад на траекторыю паступальнага росту. Беларусь з 2006 па 2018 год паднялася з 124-га да 38-га месца ў міжнародным рэйтынгу вядзення бізнесу, лідзіруе сярод краін СНД па індэксе чалавечага развіцця, індэксе кібербяспекі, вядучыя рэйтынгавыя агенцтвы павысілі доўгатэрміновыя суверэнныя крэдытныя рэйтынгі Беларусі.

Рост ВВП па выніках працы за студзень-май бягучага года склаў 104,7%, склаўся самы мінімальны за ўсю гісторыю краіны ўзровень інфляцыі (2,5%) і стаўкі рэфінансавання (10% гадавых). «Хоць, на наш погляд, яшчэ ёсць рэзервы для зніжэння гэтай стаўкі, што дазволіць нашай эканоміцы развівацца яшчэ больш хуткімі тэмпамі».

У краіне адзначаецца рост рэалізацыі прамысловай прадукцыі: грузавых вагонаў і тэлевізараў – у 2 разы, кар’ерных самазвалаў – на 56%. Развіваецца новая для краіны вытворчасць легкавых аўтамабіляў, аб’ём якой павялічаны больш чым у 4 разы. Забяспечваецца станоўчае сальда знешняга гандлю. Тэмп росту інвестыцый у асноўны капітал за названы перыяд склаў 115%. Ён забяспечаны ў асноўным за кошт набыцця новага абсталявання і тэхналогій.

Вынік стратэгіі шматвектарнасці інвестыцыйнага супрацоўніцтва адлюстроўвае ўключэнне ў топ-10 донараў па прамых замежных інвестыцыях, акрамя Расіі і краін ЕС, інвестараў з Кітая, ААЭ і ЗША. «Давер замежнага бізнесу падкрэсліваецца ростам укладу ў статутныя фонды і рашэннямі па рэінвеставанні. Значны ўклад у інвестыцыйныя паказчыкі краіны і кампаній Магілёўскага рэгіёна, сярод якіх «Кронаспан», «Омск карбон Магілёў», «ВМГ Індустры», «Сервалюкс», «Магатэкс», «Белшына», «Магілёўхімвалакно», «Бабушкина крынка». Агульны аб’ём інвестыцый па заяўленых праектах гэтых кампаній складае больш за Вг1 млрд, што дазволіць стварыць у вобласці каля 1100 новых працоўных месцаў», – сказаў Уладзімір Зіноўскі.

Ён звярнуў увагу ўдзельнікаў форуму на прынятыя ў Беларусі заканадаўчыя акты, накіраваныя на паляпшэнне бізнес-асяроддзя і павышэнне інвестыцыйнай прывабнасці краіны. Уладзімір Зіноўскі пажадаў усім плённай і эфектыўнай працы, паспяховай рэалізацыі новых ідэй і праектаў.

БЕЛТА