Работа трох спартыўных пляцовак будзе арганізавана на рэспубліканскім свяце «Купалле» («Александрыя збірае сяброў») у аграгарадку Александрыя Шклоўскага раёна, паведамілі ў прэс-службе фонду «Дырэкцыя II Еўрапейскіх гульняў 2019 года».

У 14.00 недалёка ад галоўнай сцэны фестывалю пачне працу фірмовая палатка дырэкцыі, дзе наведвальнікаў чакае займальная віктарына аб відах спорту, якія ўваходзяць у праграму II Еўрапейскіх гульняў. За правільныя адказы арганізатары будуць дарыць удзельнікам брэндавыя сувеніры і шары. Тут жа размесціцца зона аквагрыму і будзе працаваць фатограф. Пазней сярэбраны прызёр XXIX летніх Алімпійскіх гульняў 2008 года па мастацкай гімнастыцы ў індывідуальным мнагабор’і Іна Жукава правядзе аўтограф-сесію.

Таксама з 14.00 пачне прымаць наведвальнікаў інтэрактыўная спартыўная пляцоўка, падрыхтаваная сумесна работнікамі дырэкцыі і прадстаўнікамі розных спартыўных федэрацый. Так, у правядзенні мерапрыемстваў будуць задзейнічаны ГА «Беларуская федэрацыя стральбы з лука», ГА «Беларуская асацыяцыя гімнастыкі», МГА «Беларуская федэрацыя карфбола», ГА «Беларуская федэрацыя бадмінтона», Асацыяцыя «Федэрацыя хакея Рэспублікі Беларусь», РГА «Беларускі альянс танцавальнага спорту», ГА «Беларуская федэрацыя лёгкай атлетыкі», МСОО «Федэрацыя варкаўт» і ГА «Беларуская федэрацыя петанка і боча».

Кожная з арганізацый падрыхтуе для наведвальнікаў шэраг цікавых актыўнасцяў, а таксама прадаставіць усю неабходную інфармацыю па сваім відзе спорту. Чакаецца, што Беларуская федэрацыя лёгкай атлетыкі арганізуе паласу перашкод для дзяцей. Усе жадаючыя змогуць паспрабаваць свае сілы ў хакеі на пляцоўцы нацыянальнай федэрацыі. Трэнеры і спартсменкі правядуць навучанне асноўным элементам мастацкай гімнастыкі ў зоне Беларускай асацыяцыі гімнастыкі. Беларуская федэрацыя бадмінтона арганізуе пляцоўку для гульні, а таксама фотазону. Клуб стральбы з лука Archery Club правядзе спаборніцтвы па лучных баях, створыць зону для гульні ў міні-гольф і адкрые лучна-арбалетны цір. Госці фестывалю таксама змогуць пазнаёміцца з гульнёй у петанк і паспаборнічаць у кідках на выбіванне і дакладнасць на пляцоўцы петанка і боча.

У 17:00 на галоўнай сцэне пачнуцца паказальныя выступленні чырлідараў, тэатра гімнастыкі, майстроў гіравага і танцавальнага спорту, ММА, таэквандо. Нумары для гасцей фестывалю падрыхтуюць калектывы Беларускага дзяржаўнага ўніверсітэта фізічнай культуры, а таксама прадстаўнікі Беларускага альянсу танцавальнага спорту і спартыўнага грамадскага аб’яднання «Адраджэнне».

Дапамогу ў арганізацыі ўсіх мерапрыемстваў на пляцоўках дырэкцыі акажуць кандыдаты ў валанцёры II Еўрапейскіх гульняў.